தமிழ் திரையுலகின் முன்னணி இயக்குனர்களில் ஒருவரான கெளதம் மேனன் தேசிய விருது பெற்ற இயக்குனர் வெற்றிமாறனுடன் இணையும் தகவல் வெளிவந்து கோலிவுட் திரையுலகில் ஆச்சரியப்படுத்தியுள்ளது.

வெற்றிமாறன் தற்போது சூரி, விஜய் சேதுபதி நடிக்கும் ’விடுதலை’ என்ற படத்தை இயக்கி வருகிறார் என்பதும் இந்த படத்தின் படப்பிடிப்பு விறுவிறுப்பாக நடைபெற்று வருகிறது என்பதும் தெரிந்ததே. மேலும் இந்த படத்தின் பர்ஸ்ட் லுக் போஸ்டர்கள் சமீபத்தில் வெளிவந்து மிகப்பெரிய அளவில் வைரலானது.

இந்த நிலையில் இந்த படத்தில் ஒரு முக்கிய கேரக்டரில் இயக்குனர் கௌதம் மேனன் நடிக்க இருப்பதாக தகவல்கள் வெளிவந்துள்ளன. அவர் இந்த படத்தில் காவல்துறை உயரதிகாரியாக நடிப்பதாக வெளிவந்துள்ள தகவல் திரையுலகை மட்டுமின்றி ரசிகர்களையும் ஆச்சரியம் அடைய செய்துள்ளது.

கௌதம் மேனன் ஏற்கனவே ஒரு சில திரைப்படங்களில் நடித்துள்ள நிலையில் வெற்றிமாறன் திரைப்படத்திலும் தனது அபாரமான நடிப்பை வெளிப்படுத்துவார் என்று எதிர்பார்க்கப்படுகிறது. மேலும் ஒரே படத்தில் வெற்றிமாறன் மற்றும் கௌதம் மேனன் இணைந்து உள்ளதும் இந்த படத்தை பெரும் எதிர்பார்ப்பை ஏற்படுத்தியுள்ளது என்பது குறிப்பிடத்தக்கது. சூரி நாயகனாக நடிக்கும் இந்தப் படத்தில் விஜய்சேதுபதி இணைந்துள்ளதை அடுத்து தற்போது கௌதம் மேனனும் இணைந்துள்ளார் என்பது குறிப்பிடத்தக்கது.

இந்த படத்திற்கு இசைஞானி இளையராஜா இசையமைத்து வருகிறார் என்பதும் இந்த படத்தின் படப்பிடிப்பு விரைவில் முடிவடைய உள்ளது என்பதும் குறிப்பிடத்தக்கது.