விஜய் நடிக்கவிருந்த படத்தில் அறிமுக ஹீரோவா?
- IndiaGlitz, [Tuesday,July 23 2019]
பிரபல இயக்குனர் கௌதம் மேனன் இயக்கத்தில் தனுஷ் நடித்த 'எனை நோக்கி பாயும் தோட்டா' திரைப்படமும், விக்ரம் நடித்த 'துருவ நட்சத்திரம்' என்ற திரைப்படமும் விரைவில் வெளியாக உள்ளது. இதில் 'எனை நோக்கி பாயும் தோட்டா' திரைப்படத்தை ரிலீஸ் செய்ய பிரபல தயாரிப்பாளர் ஐசரி கணேஷ் உதவி செய்ய உள்ளதாக செய்திகள் வெளிவந்தது.
இந்த நிலையில் தற்போது கௌதம் மேனன் இயக்கும் புதிய படம் ஒன்றில் ஐசரி கணேஷ் அவர்களின் நெருங்கிய உறவினர் வருண் நாயகனாக நடிக்க உள்ளதாக செய்திகள் வெளிவந்துள்ளது. வருண் ஏற்கனவே 'தலைவா', 'ஒரு நாள் இரவில்', உள்பட ஒரு சில படங்களில் நடித்திருந்தாலும் ஹீரோவாக இந்த படத்தில்தான் நடிக்கவுள்ளார் என்பது குறிப்பிடத்தக்கது.
கௌதம் மேனன் இயக்கத்தில் வருண் நடிக்க உள்ள புதிய படத்தின் படப்பிடிப்பு விரைவில் பிரிட்டனில் நடைபெற உள்ளதாகவும், இந்த படத்திற்கான ஆரம்பகட்ட பணிகள் தொடங்கி விட்டதாகவும் செய்திகள் வெளிவந்துள்ளது. இந்த படத்திற்கு 'ஜோஸ்வா அத்தியாயம் ஒன்று' என்ற தலைப்பு வைக்கப்பட்டுள்ளதாக தெரிகிறது. இதுகுறித்த முறையான அறிவிப்பு விரைவில் வெளி வரவுள்ளது. ஏற்கனவே கௌதம் மேனன் இயக்கத்தில் விஜய் நடிக்க இருப்பதாக கூறப்பட்ட ஒரு படத்திற்கு 'யோஹன் அத்தியாயம் ஒன்று' என்ற தலைப்பு வைக்கப்பட்டு இருந்த நிலையில், விஜய் நடிக்கவிருந்த படத்தில்தான் வருண் நடிக்கவுள்ளாரா? என்ற கேள்வி எழுந்துள்ளது.