கவுண்டமணியின் 'ஒத்த ஓட்டு முத்தையா'படத்தின் கதை இதுவா?
- IndiaGlitz, [Tuesday,October 24 2023]
நகைச்சுவை நடிகர் கவுண்டமணி தற்போது ’ஒத்த ஓட்டு முத்தையா’ என்ற படத்தில் முக்கிய வேடத்தில் நடித்து வரும் நிலையில் இந்த படத்தின் கதை என்ன என்பது குறித்த தகவல் கசிந்துள்ளது.
நீண்ட இடைவேளைக்கு பிறகு கவுண்டமணி முக்கிய வேடத்தில் நடித்து வரும் திரைப்படம் ’ஒத்த ஓட்டு முத்தையா’. சாய் ராஜகோபால் என்பவர் இயக்கத்தில், சித்தார்த் விபின் இசையில் இந்த படம் உருவாகி வருகிறது.
இந்த படத்தின் படப்பிடிப்பு கடந்த சில மாதங்களாக நடைபெற்ற நிலையில் தற்போது படப்பிடிப்பு இறுதி கட்டத்தில் உள்ளதாக தகவல் வெளியாகியுள்ளது. மேலும் இந்த படம் குடும்ப செண்டிமெண்ட் கதை அம்சம் மட்டுமின்றி அரசியல் காமெடிகள் இருக்கும் என்றும் இந்த படத்தில் கவுண்டமணி ஒரு அரசியல்வாதியாக நடித்திருக்கிறார் என்றும் கூறப்படுகிறது.
மேலும் கவுண்டமணிக்கு 3 சகோதரிகள் இருப்பதாகவும் அந்த மூன்று சகோதரிகளும், சகோதரர்களாக இருக்கும் மூன்று பேரை தான் திருமணம் செய்வேன் என்று பிடிவாதமாக இருப்பதால் அவர்களுக்கு எப்படி கவுண்டமணி திருமணம் செய்து வைக்கிறார் என்பதுதான் இந்த படத்தின் கதை என்று கூறப்படுகிறது.
கவுண்டமணியின் சகோதரிகளாக சைதன்யா, அபர்ணா மற்றும் பிந்து ஆகிய மூன்று நடிகைகள் நடிக்கும் நிலையில் இவர்களுக்கு ஜோடியாக நாகேஷ் பேரன் கஜேஷ், மயில்சாமி மகன் அன்பு மயில்சாமி மற்றும் சிங்கமுத்து மகன் வாசன் கார்த்திக் ஆகியோர் நடித்து வருகின்றனர். இந்த படத்தின் ரிலீஸ் தேதி விரைவில் அறிவிக்கப்படும் என்று எதிர்பார்க்கப்படுகிறது.