தனுஷின் 'பா.பாண்டி 2' படத்தில் கவுண்டமணி?
- IndiaGlitz, [Tuesday,February 11 2020]
நடிகர், பாடகர், பாடலாசிரியர், தயாரிப்பாளர் என பல அவதாரங்களில் ஜொலித்து வரும் தனுஷ் கடந்த 2017ம் ஆண்டு ’பா.பாண்டி’ என்ற படத்தை இயக்கியதன் மூலம் இயக்குனராகவும் மாறினார். இந்த படம் நல்ல வரவேற்பை பெற்றதை அடுத்து தனுஷ் ஒரு நல்ல இயக்குனர் என்ற பெயரையும் பெற்று விட்டார் என்பது குறிப்பிடத்தக்கது.
இந்த நிலையில் கடந்த சில மாதங்களாக தனுஷ் இயக்கவுள்ள அடுத்த படம் குறித்த செய்திகள் அவ்வப்போது வெளிவந்து கொண்டிருந்த நிலையில் தற்போது ’பா.பாண்டி’ படத்தின் இரண்டாம் பாகம் உருவாக இருப்பதாக செய்திகள் வெளியாகியுள்ளது. ராஜ்கிரண், ரேவதி, பிரசன்னா, சாயாசிங் நடித்த இந்தப் படத்தின் அடுத்த பாகத்தில் கவுண்டமணி முக்கிய கேரக்டரில் நடிக்க இருப்பதாக கூறப்படுகிறது. இவர் ராஜ்கிரண் கேரக்டருடன் இந்த படத்தில் டிராவல் செய்வார் என்று எதிர்பார்க்கப்படுகிறது.
காமெடி நடிகர் கவுண்டமணி கடந்த சில வருடங்களாக எந்த படத்திலும் நடிக்காமல் இருக்கும் நிலையில் தனுஷின் இயக்கத்தில் ஒப்புக் கொண்டுள்ளார் என்பதே இந்த படத்தின் எதிர்பார்ப்பை அதிகரிக்க செய்துள்ளது என்பது குறிப்பிடத்தக்கது.