கமல்ஹாசன் தொகுத்து வழங்கிய பிக்பாஸ் நிகழ்ச்சியில் பங்கேற்ற பலருக்கு நிகழ்ச்சி முடிந்த பின்னர் சினிமாவிலும் தொலைக்காட்சிகளிலும் வாய்ப்பு கிடைத்துள்ளது. ஓவியாவுக்கு 'முனி 3', ஆரவ்வுக்கு  இயக்குனர் சரவணன் இயக்கும் படம், ஹரிஷ் கல்யாண்-ரைசா இணைந்து நடிக்கும் ஒரு படம், ஹரிஷ் கல்யாணுகு சிம்பு இசையில் பாட வாய்ப்பு, ஜூலிக்கு தொலைக்காட்சி தொகுப்பாளர் பணி என பிக்பாஸ் பங்கேற்பாளர்கள் பலருக்கு நல்ல வாய்ப்புகள் கிடைத்துள்ளது.

இந்த நிலையில் பிக்பாஸ் நிகழ்ச்சியின் இறுதி வரை வந்த நடிகர் கணேஷ் வெங்கட்ராமனுக்கு தற்போது ஒரு முக்கிய திரைப்படம் வாய்ப்பு கிடைத்துள்ளது. ஏற்கனவே கணேஷ் வெங்கட்ராமன் ஹீரோ உள்பட பல வேடங்களில் நடித்தவர் என்றாலும் தற்போது அவர் மலையாள திரையுலகில் நடிக்கும் வாய்ப்பை பெற்றுள்ளார்.

பிரித்விராஜ் நடிக்கும் 'மை ஸ்டோரி' என்ற படத்தில் கணேஷ் வெங்கட்ராமன் முக்கிய வேடத்தில் நடிக்கவுள்ளதாகவும், இந்த வேடம் அவருக்கு மலையாள திரையுலகில் திருப்புமுனையை கொடுக்கும் என்றும் எதிர்பார்க்கப்படுகிறது. கணேஷ் ஏற்கனவே அமிதாப்பச்சன், மோகன்லால் நடித்த 'காந்தஹார்' என்ற மலையாள படத்தில் நடித்துள்ளார் என்பது குறிப்பிடத்தக்கது.