మాస్ మహారాజా రవితేజ లేటెస్ట్‌గా నటిస్తోన్న సినిమా 'ఖిలాడి' . రమేష్ వర్మ దర్శకత్వం వహిస్తున్న ఈ సినిమాకి సంబంధించి విడుదలైన టీజర్, పాటలకు ప్రేక్షకుల నుంచి మంచి రెస్పాన్స్ వస్తోంది. తాజాగా హీరో రవితేజ పుట్టినరోజును పురస్కరించుకుని బుధవారం ఈ సినిమా నుంచి 'ఫుల్ కిక్కు' అంటూ సాగే లిరికల్ సాంగ్‌ను విడుదల చేశారు మేకర్స్. శ్రీమణి సాహిత్యం అందించగా.. సాగర్, మమతా శర్మ ఈ పాటను ఆలపించారు.

శేఖర్ మాస్టర్ ఈ పాటకు కొరియోగ్రఫీ అందించగా.. రవితేజ హీరోయిన్ డింపుల్ హయాతి తన మాస్ స్టెప్స్ తో ఆకట్టుకున్నారు. వాస్తవానికి ఈ పాటను ఈ రోజు ఉదయం 10 గంటల సమయంలో విడుదల చేయాలని ప్లాన్ చేశారు. అయితే కొన్ని కారణాల వలన సాయంత్రం విడుదల చేయాల్సి వచ్చింది. ఈ సినిమాలో రవితేజ సరసన మీనాక్షి చౌదరి, డింపుల్ హయతి హీరోయిన్స్‌గా ఆడిపాడనున్నారు. దేవీశ్రీ ప్రసాద్ సంగీతం అందించారు.

ఖిలాడీలో యాక్షన్ కింగ్ అర్జున్ కీ రోల్ ప్లే చేస్తున్నారు. వీర సినిమా తర్వాత రమేశ్ వర్మ - రవితేజ కాంబినేషన్‌లో తెరకెక్కుతోన్న ఈ యాక్షన్ థ్రిల్లర్ పై భారీ అంచనాలు వున్నాయి. కోనేరు సత్యనారాయణ నిర్మాతగా వ్యవహరిస్తున్న ఈ సినిమాను ఫిబ్రవరి 11న ప్రేక్షకుల ముందుకు తీసుకురానున్నారు. ఖిలాడీ కాకుండా రవితేజ చేతిలో నాలుగు సినిమాలు వున్నాయి. ధమాకా, రావణాసుర, రామారావు ఆన్ డ్యూటీతో పాటు టైగర్ నాగేశ్వరరావు చిత్రాల్లో ఆయన నటిస్తున్నారు.

ఇందులో రామారావు ఆన్ డ్యూటీ విడుదల తేదీ కూడా ఇప్పటికే ఫిక్స్ అయింది. శరత్ మండవ డైరెక్ట్ చేస్తోన్న ఈ సినిమాను మార్చి 25న విడుదల చేయడానికి ప్లాన్ చేస్తున్నారు. దివ్యాంక కౌశిక్, రజిషా విజయన్ హీరోయిన్లుగా నటిస్తున్న ఈ సినిమాలో సీనియర్ హీరో వేణు తొట్టెంపూడి కీల‌క‌పాత్రలో కనిపించనున్నారు