വി ഡി സതീശൻ്റെ ഡ്രൈവറുടെ പേരിൽ തട്ടിപ്പ്
- IndiaGlitz, [Tuesday,August 01 2023]
പ്രതിപക്ഷ നേതാവ് വിഡി സതീശൻ്റെ ഡ്രൈവര്‍ ജയിംസിൻ്റെ പേരില്‍ ഓണ്‍ലൈനില്‍ പണം തട്ടിയെന്ന് പരാതി. പറവൂര്‍ നഗരസഭയിലെ താത്കാലിക ജീവനക്കാരന്‍ സുരാഗിനാണ് പതിനായിരം രൂപ നഷ്ടമായത്. തട്ടിപ്പിനിരയായ സുരാഗും ജെയിംസും പോലീസില്‍ പരാതി നല്‍കി. ജയിംസിൻ്റെ പേരില്‍ വ്യാജ ഫെയ്സ്ബുക് അക്കൗണ്ട് ഉണ്ടാക്കിയാണ് തട്ടിപ്പ് നടത്തിയത്.
തിങ്കളാഴ്ച രാവിലെയാണ് സംഭവം. 20,000 രൂപയാണ് തട്ടിപ്പ് നടത്തിയയാള്‍ ചോദിച്ചത്. എന്നാല്‍ 10,000 രൂപയേ തൻ്റെ കൈയിലുള്ളു എന്ന് സുരാഗ് അറിയിച്ചു. തുടര്‍ന്ന് 10,000 രൂപ അയച്ചു നല്‍കുകയായിരുന്നു. ജയിംസിൻ്റെ പേരില്‍ വ്യാജ ഫെയ്സ്ബുക്ക് അക്കൗണ്ട് ഉണ്ടാക്കിയ ശേഷം ജയിംസിൻ്റെ തന്നെ സുഹൃത്തായ സുരാഗിനോട് ഫെയ്സ്ബുക്ക് മെസന്‍ജര്‍ വഴി പണം ആവശ്യപ്പെടുകയായിരുന്നു. പിന്നാലെ ജയിംസിനെ ഫോണില്‍ വിളിച്ചപ്പോഴാണ് തട്ടിപ്പ് മനസ്സിലായത്. ഇഎംഐ അടക്കാന്‍ വെച്ചിരുന്ന പണമാണ് അയച്ചു കൊടുത്തതെന്ന് സുരാഗ് പറഞ്ഞു. സംഭവത്തില്‍ ജെയിംസ് റൂറല്‍ എസ്പിക്കും സുരാഗ് നോര്‍ത്ത് പറവൂര്‍ പോലീസ് സ്റ്റേഷനിലും പരാതി നല്‍കി.