నోట్ట రద్దు సమయంలో మనదేశంలో అందుబాటులోకి వచ్చిన యునిఫైట్ పేమెంట్స్ ఇంటర్‌ఫేస్‌కు ప్రజల నుంచి మంచి స్పందన వస్తోన్న సంగతి తెలిసిందే. ఎక్కడికి వెళ్లినా డబ్బుతో పని లేకుండా స్మార్ట్‌ఫోన్, చిన్న క్యూఆర్ కోడ్ ద్వారా చెల్లింపులు జరిగిపోతుండటంతో ప్రజలు కూడా దీనికి బాగా అలవాటు పడ్డారు. పనిలో పనిగా డిజిటల్ పేమెంట్స్ లక్ష్యంగా కేంద్రం ప్రణాళికలు కూడా సత్ఫలితాలను ఇస్తున్నాయి. యూపీఐ అందుబాటులోకి వచ్చిన నాటి నుంచి ఈ ఏడాది మార్చి వరకు 8.27 లక్షల కోట్ల విలువైన 452.75 కోట్ల డిజిటల్ లావాదేవీలు జరిగాయని కేంద్ర గణాంకాలు చెబుతున్నాయి. భారత్‌లో రోజుకి ఒక బిలియన్‌ యూపీఐ లావాదేవీలు జరుగుతున్నాయని నేషనల్ పేమెంట్‌ కార్పొరేషన్ ఆఫ్‌ ఇండియా (ఎన్‌పీసీఐ) నివేదిక తెలిపింది. అంతేకాదు.. డిజిటల్ లావాదేవీల్లో భారత్ ప్రపంచంలోనే తొలి స్థానంలో నిలిచింది. విప్లవాత్మక నిర్ణయాలు, సరికొత్త ఆవిష్కరణలతో భారత్ నగదు రహిత ఆర్ధిక వ్యవస్థ దిశగా అత్యంత వేగంగా అడుగులు వేస్తోంది.

ప్రవాస భారతీయులతో మోడీ భేటీ :

ఇదిలావుండగా.. అనేక దేశాలు మన యూపీఐ విధానాన్ని అందిపుచ్చుకుని డిజిటల్ లావాదేవీలు నిర్వహిస్తున్న సంగతి తెలిసిందే. ఈ లిస్ట్‌లో ఫ్రాన్స్ కూడా చేరనుంది. త్వరలోనే ఇక్కడ యూపీఐ సేవలు ప్రారంభంకానున్నాయి. రెండు రోజుల పర్యటన నిమిత్తం ఫ్రాన్స్‌కు వెళ్లిన ప్రధాని నరేంద్ర మోడీ పారిస్‌లో ప్రవాస భారతీయులతో సమావేశమయ్యారు. ఈ సందర్భంగా యూపీఐ లావాదేవీలు త్వరలో ఫ్రాన్స్‌లోనూ ప్రారంభం కానున్నాయని మోడీ తెలిపారు. త్వరలోనే ఈఫిల్ టవర్ వద్ద ఈ సేవలు ప్రారంభమవుతాయని.. ఈ పర్యాటక ప్రదేశాన్ని చూసేందుకు వచ్చే భారత పర్యాటకులు భారత కరెన్సీని ఇక్కడ చెల్లింపుల నిమిత్తం వాడవచ్చని నరేంద్ర మోడీ తెలిపారు.

యూపీఐను విస్తరించే పనిలో ఎన్‌పీసీఐ :

ఫ్రాన్స్‌లో యూపీఐ అందుబాటులోకి రావడం వల్ల భారతీయులు చాలా మేలు జరుగుతుందని ఆర్ధిక నిపుణులు చెబుతున్నారు. అస్తవ్యస్తంగా వున్న ఫారెక్స్ కార్డ్‌లు వినియోగం, నగదును తీసుకెళ్లాల్సిన అవసరాన్ని యూపీఐలు నివారించనున్నాయి. గతేడాది ఎన్‌పీసీఐ, ఫ్రాన్స్‌‌కు చెందిన లైరాలు ఒక అవగాహన ఒప్పందంపై సంతకాలు చేశాయి. ఇప్పటికే మన యూపీఐ విధానాన్ని యూఏఈ, భూటాన్, నేపాల్‌‌, సింగపూర్‌లు విజయవంతంగా ఉపయోగిస్తున్నాయి. తాజాగా ఫ్రాన్స్‌లోనూ యూపీఐ అమల్లోకి రావడంతో అమెరికా, ఐరోపా, పశ్చిమ ఆసియా దేశాల్లోనూ ప్రవేశపెట్టాలని ఎన్‌పీసీఐ ప్రణాళికలు రూపొందిస్తోంది.