క్షీణిస్తోన్న మాజీ రాష్ట్రపతి ప్రణబ్ ఆరోగ్యం..
- IndiaGlitz, [Wednesday,August 26 2020]
భారత మాజీ రాష్ట్రపతి ప్రణబ్ ముఖర్జీ ఆరోగ్యం మరింత క్షీణించిందని ఢిల్లీలోని కంటోన్మెంట్ ఆర్మీ ఆసుపత్రి బుధవారం వెల్లడించింది. ప్రస్తుతం ఊపరితిత్తులు ఇన్‌ఫెక్షన్‌కు చికిత్సనందిస్తున్నామని ఆసుపత్రి వర్గాలు వెల్లడించాయి. ఆయన ఇప్పటికీ కోమాలో కొనసాగుతున్నారని, వెంటిలేటర్ సహాయంతో చికిత్స పొందుతున్నారని పేర్కొంది. మంగళవారం ఆయన రెనల్ పెరామీటర్స్ కొద్దిగా క్రమం తప్పినట్లు ఆసుపత్రి వర్గాలు వెల్లడించాయి.
మెదడులో రక్తం గడ్డకట్టడంతో ఆగస్ట్ 10న ప్రణబ్ చికిత్స నిమిత్తం ఢిల్లీలోని ఆర్మీ ఆసుపత్రిలో చేరారు. ఆ సమయంలో ఆయనకు కరోనా పరీక్ష నిర్వహించగా పాజిటివ్ అని తేలింది. వెంటనే ఆయన ట్విట్టర్ వేదికగా తనతో టచ్‌లో ఉన్నవారంతా పరీక్ష చేయించుకోవాలని కోరారు. అనంతరం ఆయనకు బ్రెయిన్‌కు సంబంధించిన శస్త్ర చికిత్స జరిగింది. ప్రత్యేక వైద్య నిపుణుల బృందం ప్రణబ్ ఆరోగ్యాన్ని ఎప్పటికప్పుడు పర్యవేక్షిస్తోందని ఆసుపత్రి వర్గాలు వెల్లడించాయి.