ரஜினி கட்சியின் முதல்வர் வேட்பாளர் என பரபரப்பாக பேசப்பட்டவர் திடீரென இன்று பாஜகவில் இணைவதாக வெளிவந்திருக்கும் தகவலால் பெரும் பரபரப்பு ஏற்பட்டுள்ளது.

சூப்பர் ஸ்டார் ரஜினிகாந்த் அவர்கள் விரைவில் கட்சி தொடங்குவார் என்று எதிர்பார்க்கப்படுகிறது. மேலும் அவர் கடந்த சில மாதங்களுக்கு முன்னர் அளித்த பேட்டியில் ’தான் முதல்வர் வேட்பாளர் இல்லை’ என்றும் தெரிவித்தார்.

இதனை அடுத்து முன்னாள் ஐபிஎஸ் அதிகாரி அண்ணாமலை அவர்கள் தான் ரஜினி கட்சியின் முதல்வர் வேட்பாளர் என்று பரவலாக ஊடகங்களில் செய்திகள் வெளியானது. இந்த நிலையில் முன்னாள் ஐபிஎஸ் அதிகாரி அண்ணாமலை இன்று பாஜகவில் இணைய இருப்பதாக செய்திகள் வெளியாகியுள்ளது. டெல்லியில் இன்று நடைபெறும் விழாவில் பாஜக தேசிய தலைவர் ஜேபி நட்டா மற்றும் தமிழக பாஜக தலைவர் எல் முருகன் ஆகியோர் முன்னிலையில் பாஜகவில் அவர் தன்னை இணைத்துக் கொள்ள இருப்பதாக உறுதி செய்யப்பட்ட செய்திகள் வெளியாகி உள்ளது.

முன்னாள் ஐபிஎஸ் அதிகாரி அண்ணாமலை சமீபத்தில் தனது பதவியை ராஜினாமா செய்தார் என்பதும், அரசியலில் இறங்கி சேவை செய்யப் போவதாக தெரிவித்திருந்தார் என்பதும் குறிப்பிடத்தக்கது. ரஜினிக்கு மிக நெருக்கமானவராக கருதப்பட்ட இவர் ரஜினி கட்சியின் முதல்வர் வேட்பாளராக நிற்பதற்கு அதிக வாய்ப்பு இருப்பதாக கூறப்பட்ட நிலையில் தற்போது அவர் திடீரென பாஜகவில் இணைகிறார் என்பது குறிப்பிடத்தக்கது.