పార్లమెంట్ ఎన్నికల్లో పోటీ చేసే మరో ఇద్దరు అభ్యర్థులను బీఆర్ఎస్ ప్రకటించింది. నాగర్ కర్నూలు ఎంపీ స్థానానికి మాజీ ఐపీఎస్ అధికారి ఆర్ఎస్ ప్రవీణ్‌కుమార్, మెదక్ ఎంపీ స్థానానికి మాజీ ఐఏఎస్ అధికారి, ఎమ్మెల్సీ వెంకట్రామిరెడ్డికి పార్టీ అధినేత కేసీఆర్ అవకాశం ఇచ్చారు. దీంతో ఇప్పటివరకు మొత్తం 17 నియోజకవర్గాలకు గాను 13 స్థానాలకు అభ్యర్థులను ప్రకటించారు. మిగిలిన 4 స్థానాలకు కూడా త్వరలోనే అభ్యర్థులను వెల్లడించనున్నారు.

మాజీ ఐపీఎస్ అధికారి అయిన ఆర్ఎస్ ప్రవీణ్ కుమార్.. తన ఉద్యోగానికి స్వచ్ఛంద పదవీ విరమణ చేసి బీఎ్సపీ పార్టీలో చేరిన సంగతి తెలిసిందే. అనంతరం తెలంగాణ రాష్ట్ర అధ్యక్షుడిగా నియమితులయ్యారు. ఇటీవల జరిగిన అసెంబ్లీ ఎన్నికల్లో సిర్పూర్ నుంచి ఎమ్మెల్యేగా పోటీ చేసి ఓడిపోయారు. ఇటీవల పార్లమెంట్ ఎన్నికల్లో బీఆర్ఎస్ పార్టీతో పొత్తును ప్రకటించారు. అయితే పొత్తుకు పార్టీ అధినేత్రి మాయావతి ఒప్పుకోకపోటవంతో ఆ పార్టీకి రాజీనామా చేశారు. అనంతరం కేసీఆర్ సమక్షంలో గులాబీ కండువా కప్పుకున్నారు.

ఇక మెదక్ స్థానం నుంచి అనుహ్యంగా సిద్ధిపేట మాజీ కలెక్టర్, బీఆర్ఎస్ ఎమ్మెల్సీ వెంకట్రామిరెడ్డి పేరును ఖరారు చేశారు. 1996లో గ్రూప్‌-1 ఉద్యోగం సాధించిన వెంకట్రామిరెడ్డి 2007లో ఐఏఎస్‌ హోదా పొందారు. రాష్ట్ర విభజన తర్వాత సిరిసిల్ల, సిద్ధిపేట జిల్లాలకు కలెక్టర్‌గా బాధ్యతలు నిర్వర్తింఆరు. అయితే 2021లో తన ఉద్యోగానికి స్వచ్ఛంద పదవీ విరమణ చేసి బీఆర్ఎస్ పార్టీలో చేరారు. అదే సంవత్సరం జరిగిన శాసనమండలి ఎన్నికల్లో ఎమ్మెల్యే కోటాలో ఎమ్మెల్సీగా ఎన్నికయ్యారు.

13 మంది బీఆర్ఎస్ ఎంపీ అభ్యర్థుల జాబితా..

పెద్దపల్లి(ఎస్సీ)- కొప్పుల ఈశ్వర్
మహబూబ్‌ నగర్- మన్నె శ్రీనివాస్ రెడ్డి
మల్కాజ్ గిరి- రాగిడి లక్ష్మారెడ్డి
ఆదిలాబాద్- ఆత్రం సక్కు
చేవెళ్ల- కాసాని జ్ఞానేశ్వర్ ముదిరాబాద్
వరంగల్(ఎస్సీ )- డాక్టర్ కడియం కావ్య
జహీరాబాద్- గాలి అనిల్ కుమార్
నిజామాబాద్- బాజిరెడ్డి గోవర్ధన్
కరీంనగర్- బోయినపల్లి వినోద్ కుమార్
ఖమ్మం- నామా నాగేశ్వరరావు
మహబూబాబాద్(ఎస్టీ)- మాలోత్ కవిత
నాగర్ కర్నూల్- ఆర్ఎస్ ప్రవీణ్ కుమార్
మెదక్- పి. వెంకట్రామిరెడ్డి