முன்னாள் திமுக எம்பியும், பத்திரிகையாளரும், எழுத்தாளருமான வசந்தி ஸ்டான்லி உடல்நலக்குறைவால் காலமானார். அவருக்கு வயது 56

கடந்த 2008ஆம் ஆண்டு முதல் 2014ஆம் ஆண்டு வரை மாநிலங்களவை உறுப்பினராக பணியாற்றிய வசந்தி ஸ்டான்லி, மறைந்த திமுக தலைவர் கருணாநிதியின் நன்மதிப்பை பெற்றவர். கனிமொழியின் ஆதரவாளர் என்று கருதப்படும் இவர் கடந்த சில நாட்களாக உடல்நலமின்றி தனியார் மருத்துவமனையில் சிகிச்சை பெற்று வந்தார்.

இந்த நிலையில் சிகிச்சையின் பலனின்றி நேற்றிரவு வசந்தி ஸ்டான்லி காலமானார். அவருடைய உடல் சென்னை லாயிட்ஸ் காலனியில் உள்ள அவரது வீட்டில் பொதுமக்கள் அஞ்சலிக்காக இன்று மாலை 6 மணி வரை வைக்கப்பட உள்ளது. இதனையடுத்து அவரது சொந்த ஊரான பாளையங்கோட்டை எடுத்துச் செல்லப்பட்டு நாளை இறுதிச்சடங்குகள் நடைபெறும் என உறவினர்கள் தகவல் தெரிவித்துள்ளனர்.

வசந்தி ஸ்டான்லி மறைவிற்கு நேரில் அஞ்சலி செலுத்திய திமுக தலைவர் மு.க.ஸ்டாலின், அவருடைய மறைவு திமுகவுக்கு பேரிழப்பு என்று தெரிவித்தார்.