சூப்பர் ஸ்டார் ரஜினிகாந்த் அவர்களை முன்னாள் முதல்வர் ஓ பன்னீர்செல்வம் இன்று திடீரென சந்தித்திருப்பது தமிழக அரசியலில் பெரும் பரபரப்பை ஏற்படுத்தி உள்ளது.

சூப்பர் ஸ்டார் ரஜினிகாந்த் நடித்த ’ஜெயிலர்’ திரைப்படம் மாபெரும் வெற்றி பெற்றதை அடுத்து அவர் சமீபத்தில் இமயமலைக்கு ஆன்மீக சுற்றுப்பயணம் செய்தார்.

அந்த சுற்றுப்பயணத்தை முடித்துவிட்டு சென்னை வரும் வழியில் சில அரசியல் தலைவர்களை சந்தித்தார் என்பதும் அவர்களில் ஒருவர் உத்தர பிரதேசம் மாநில முதலமைச்சர் யோகி ஆதித்யநாத் என்பதும் தெரிந்ததே.

மேலும் ரஜினிகாந்த் சமீபத்தில் பெங்களூர் சென்று அங்கு தான் பணிபுரிந்த பேருந்து பணிமனையில் உள்ள ஊழியர்களை சந்தித்தார். பின்னர் தனது பெற்றோர் நினைவு இடத்திற்கு சென்ற புகைப்படங்கள் இணையத்தில் வைரலாகின.

இந்த நிலையில் நடிகர் ரஜினிகாந்தின் போயஸ் தோட்ட இல்லத்தில் இன்று முன்னாள் முதலமைச்சர் ஓ பன்னீர்செல்வம் சந்தித்துள்ளார். இந்த சந்திப்பு மரியாதை நிமித்தமான சந்திப்பு என்று கூறப்பட்டாலும் தற்போதைய அரசியல் நிலவரம் குறித்து இருவரும் பேசியதாக கூறப்படுகிறது.