முதல்முறையாக மைக் மோகனுடன் ஜோடி சேரும் குஷ்பு!
- IndiaGlitz, [Monday,February 14 2022]
கடந்த 80 களில் பல சூப்பர் ஹிட் திரைப்படங்களை கொடுத்த சில்வர் ஜூப்ளி ஸ்டார் மோகன் நீண்ட இடைவெளிக்கு பின்னர் மீண்டும் ஒரு திரைப்படத்தில் நடிக்க இருப்பதாகவும் அந்த திரைப்படத்தை விஜய் ஸ்ரீ இயக்க இருப்பதாக வெளிவந்த தகவலை ஏற்கனவே பார்த்தோம்.
இந்த படத்தின் படப்பிடிப்பு விரைவில் தொடங்கவுள்ள நிலையில் இந்த படம் குறித்த மேலும் சில தகவல்கள் வெளியாகி உள்ளன. மோகன் முக்கிய வேடத்தில் நடிக்கும் இந்த படத்தில் முதல் முறையாக அவருக்கு ஜோடியாக குஷ்பு நடிக்க உள்ளார். நடிகை குஷ்பு கடந்த 90 களில் இருந்து பல முன்னணி நடிகர்களுடன் நடித்து இருந்தாலும் மோகனுடன் மட்டும் தமிழில் இதுவரை எந்த படத்திலும் நடிக்கவில்லை.
இதனையடுத்து தனது நீண்ட கால கனவு நனவாகி இருப்பதாகவும் ’மௌன கீதம்’ படம் பார்த்து தான் அவருடைய ரசிகையாக தான் மாறியதாகவும் அவருடன் நடிக்கும் வாய்ப்பை கொடுத்த இயக்குனர் விஜய்ஸ்ரீக்கு தனது நன்றியை தெரிவித்துக் கொள்வதாகவும் குஷ்பு தனது சமூக வலைத்தளத்தில் தெரிவித்துள்ளார்.
‘ஹரா’ என்ற டைட்டில் வைக்கப்பட்டுள்ள இந்த படத்தில் உலக நாயகன் கமல்ஹாசனின் சகோதரர் சாருஹாசன் முக்கிய வேடத்தில் நடிக்க உள்ளார் என்பது குறிப்பிடத்தக்கது.