వికారాబాద్ జిల్లాలో ఘోర రోడ్డు ప్రమాదం.. ఐదుగురి మృతి
- IndiaGlitz, [Saturday,December 26 2020]
రెక్కాడితే కానీ డొక్కాడని నిరుపేద కూలీలు.. తెలతెలవారకముందే పని వెదుక్కుంటూ మరో ఊరుకు ఆటోలో బయల్దేరారు. మృత్యువు లారీ, ఆర్టీసీ బస్సు రూపంలో వచ్చి.. ఐదుగురు నిరుపేద కూలీలను పొట్టనబెట్టుకుంది. మరికొందరు గాయాలతో అల్లాడిపోయారు. ఈ విషాద ఘటన వికారాబాద్ జిల్లాలో చోటు చేసుకుంది. మోమిన్ పేట్ మండలం ఇజ్రా చిట్టెంపల్లి తండాకు చెందిన కొందరు నిరుపేదలు కూలి పని కోసం ఆటోలో బయల్దేరారు. ఇజ్రా చిట్టెంపల్లి తండా సమీపంలోనే వారి ఆటోను లారీ, ఆర్టీసీ బస్సు ఢీకొట్టాయి. అంతే ఐదు ప్రాణాలు అనంత వాయువుల్లో కలిసిపోయాయి.
ఆటోను.. లారీ, బస్సు ఒకేసారి ఢీకొట్టిన వెంటనే అక్కడికక్కడే నలుగురు కూలీలు మృతి చెందగా.. మరొకరు ఆసుపత్రికి తరలిస్తుండగా ప్రాణాలు కోల్పోయారు. పలువురు గాయపడగా.. వారిని స్థానిక ఆసుపత్రికి తరలించి చికిత్సను అందిస్తున్నారు. కాగా.. మృతులంగా ఇజ్రాచిట్టెంపల్లి తండాకు చెందిన వారిగా గుర్తించారు. సమాచారం అందుకున్న పోలీసులు హుటాహుటిన ఘటనా స్థలానికి చేరుకుని సహాయక చర్యలు చేపట్టారు. కేసు నమోదు చేసుకుని దర్యాప్తు ప్రారంభించారు. తండాకు చెందిన ఐదుగురు ప్రాణాలు కోల్పోవడంతో ఇజ్రా చిట్టెంపల్లి తండాలో విషాదం నెలకొంది.