2001లో విడుద‌లైన‌ ‘నిన్ను చూడాలని’ సినిమాతో హీరోగా ఎంట్రీ ఇచ్చారు యంగ్ టైగర్ ఎన్టీఆర్. అనంతరం ‘స్టూడెంట్ నెం.1’, ‘ఆది’, ‘సింహాద్రి’ సినిమాలతో మంచి గుర్తింపు తెచ్చుకోవడమే కాకుండా.. స్టార్ హీరోగా కూడా ఎదిగారు. ఇదిలా ఉంటే.. ఇంతవరకు ఆయన 27 సినిమాల్లో నటించగా.. ఆయా సినిమాల టైటిల్స్ అన్నీ కూడా ఎన్టీఆర్ నటించిన పాత్ర పేరుతోనో.. లేదా ఆ పాత్రకి ఉన్న ప్రాముఖ్యత పేరుతోనో తెరకెక్కినవే. అయితే తొలిసారి ఈ సంప్రదాయానికి కొంత గ్యాప్ ఇచ్చి.. ఆయ‌న 28వ చిత్రానికి హీరోయిన్ క్యారెక్టర్ పేరుతో టైటిల్‌ని ఫిక్స్ చేసారు.

ఆ వివరాల్లోకి వెళితే.. ఎన్టీఆర్ హీరోగా త్రివిక్రమ్ శ్రీనివాస్ దర్శకత్వంలో తెరకెక్కుతున్న సినిమా ‘అరవింద సమేత వీర రాఘవ’. ఈ టైటిల్ చూస్తుంటే.. ఈ సినిమాలో హీరోయిన్‌గా నటిస్తున్న పూజా హెగ్డే పాత్ర‌ పేరు అరవింద అని ఇట్టే అర్థ‌మైపోతోంది. మరి ఇంతవరకు గ్లామర్ పాత్రలతో మెప్పించిన పూజా హెగ్డే.. తొలిసారిగా చేస్తున్న టైటిల్ పాత్ర‌కి న్యాయం చేసి మెప్పిస్తుందా? ఎన్టీఆర్, త్రివిక్రమ్ ఇచ్చిన ఈ అవకాశాన్ని సద్వినియోగం చేసుకుంటుందా? అనేది ఆస‌క్తిక‌రంగా మారింది. ద‌స‌రా కానుకగా ఈ సినిమా తెరపైకి రానుంది.