முதல்கட்ட படப்பிடிப்பை முடித்த விஜய்சேதுபதி படக்குழு!
- IndiaGlitz, [Saturday,March 23 2019]
மக்கள் செல்வன் விஜய்சேதுபதி நடிக்கும் படங்களின் படப்பிடிப்புகள் தொடங்குவது முடிவதும் மின்னல் வேகத்தில் நடக்கும் என்பது தெரிந்ததே! வருடக்கணக்கில் மெகா படங்களை எடுத்து கொண்டிருக்கும் படக்குழுவினர் மத்தியில் விஜய்சேதுபதியின் படக்குழு மட்டும் அதிகபட்சம் மூன்று மாதங்களில் படத்தை முடித்து ரிலீசுக்கு தயாராகிவிடுவார்கள்.
அந்த வகையில் விஜய்சந்தர் இயக்கத்தில் விஜய்சேதுபதி நடித்து வந்த படத்தின் படப்பிடிப்பு சமீபத்தில் தொடங்கிய நிலையில் தற்போது முதல்கட்ட படப்பிடிப்பு முடிவுக்கு வந்துள்ளது. இதில் விஜய்சேதுபதி, ராஷிகண்ணா சம்பந்தப்பட்ட காட்சிகளின் படப்பிடிப்புகள் முடிவடைந்துள்ளன. அடுத்தகட்ட படப்பிடிப்பில் விஜய்சேதுபதியுடன் இந்த படத்தின் இன்னொரு நாயகியான நிவேதா பேத்ராஜ் இணையவுள்ளார்.
விஜயா புரடொக்சன்ஸ் தயாரிப்பில் உருவாகி வரும் இந்த படத்திற்கு இளம் இரட்டையர்களான விவேக் சிவா-மெர்வின் சாலமன் இசையமைக்கவுள்ளனர். இந்த இரட்டையர்கள் ஏற்கனவே 'வடகறி', 'புகழ்', 'குலேபகாவலி', 'மோகினி' போன்ற படங்களுக்கு இசையமைத்துள்ளனர் என்பது குறிப்பிடத்தக்கது.
இந்த நிலையில் விஜய்சேதுபதி நடிப்பில் உருவான ''சூப்பர் டீலக்ஸ் திரைப்படம் வரும் வெள்ளியன்று வெளியாகவுள்ளது. மேலும் அவர் நடித்து முடித்துள்ள 'மாமனிதன்' திரைப்படத்தின் ரிலீஸ் தேதி விரைவில் அறிவிக்கப்படவுள்ளது. அதுமட்டுமின்றி 'சிந்துபாத்', 'சயிர நரசிம்மரெட்டி', போன்ற படங்களும் விரைவில் வெளியாகும் என எதிர்பார்க்கப்படுகிறது