சீனாவில் தொடங்கி உலகெங்கும் பரவி வரும் கொரோனா வைரஸ் சமீபத்தில் இந்தியாவிலும் பரவி வரும் நிலையில் அண்டை மாநிலமான ஆந்திராவில் ஒருவருக்கு கொரோனா வைரஸ் தொற்று இருப்பது ரத்த பரிசோதனையில் உறுதியாகியுள்ளது.

கடந்த 6ஆம் தேதி இத்தாலியில் இருந்து ஆந்திரா திரும்பிய நெல்லூரை சேர்ந்த மாணவர் ஒருவருக்கு இருமல், காய்ச்சல் இருந்ததை அடுத்து அவருக்கு கொரோனா இருக்கின்றதா? என்று பரிசோதனை செய்ய ரத்த மாதிரி எடுக்கப்பட்டது.  திருப்பதி வெங்கடேஸ்வரா மருத்துவமனையில் அனுமதிக்கப்பட்டிருந்த அந்த மாணவருக்கு தற்போது கொரோனா தாக்கியது உறுதி செய்யப்பட்டுள்ளது. இதனை அடுத்து அவர் தனிமைப்படுத்தப்பட்டு சிகிச்சை பெற்று வருகிறார்.

இருப்பினும் அவரது உடல்நிலை சீராக இருப்பதாகவும் கொஞ்சம் கொஞ்சமாக அவர் குணமாகி வருவதாகவும், 14 நாட்கள் கழித்து மீண்டும் ரத்த பரிசோதனை செய்து அதில் அவர் குணமாகிவிட்டது தெரிந்தால் அவர் டிஸ்சார்ஜ் செய்யப்படுவார் என்றும் மருத்துவர்கள் தெரிவித்துள்ளனர்.