சென்னை தி.நகர் பிரபல ஜவுளிக்கடையில் பயங்கர தீவிபத்து
- IndiaGlitz, [Wednesday,May 31 2017]
சென்னை தி.நகர் உஸ்மான் சாலையில் உள்ள பிரபல ஜவுளிக்கடையில் இன்று அதிகாலை பயங்கர தீவிபத்து ஏற்பட்டதன் காரணமாக அந்த பகுதி முழுவதும் புகை மண்டலமாக உள்ளது.
தி.நகர் உஸ்மான் சாலையில் உள்ள 7 மாடி கட்டிடம் ஒன்றில் பிரபல ஜவுளிக்கடை மற்றும் நகைக்கடை இயங்கி வருகிறது. இன்று அதிகாலை 5 மணியளவில் இந்த கடையின் தரைத்தளத்தில் திடீரென தீ விபத்து ஏற்பட்டதாகவும், அதன்பின் தீ மளமளவென அடுத்தடுத்த தளங்களுக்கும் பரவி வருவதாகவும் செய்திகள் வெளிவந்துள்ளது.
இந்த தீ விபத்து குறித்து தகவல் அறிந்தவுடன் 6 தீயணைப்பு வாகனங்களில் 40க்கும் மேற்பட்ட தீயணைப்பு படை வீரர்கள் தீயை அணைக்க 5 மணி நேரத்துக்கும் அதிகமாக போராடி வருகின்றனர். தீவிபத்தால் ஏற்பட்ட வெப்பத்தின் காரணமாக கடையில் உள்ள கண்ணாடி வெடித்து சிதறி வருவதால் அந்த பகுதியில் போக்குவரத்து நிறுத்தப்பட்டதோடு, அந்த பகுதியில் யாரும் கூடாத வகையில் பலத்த பாதுகாப்பு ஏற்பாடுகள் செய்யப்பட்டுள்ளது.
கடைக்குள் தங்கியிருந்த 12 பணியாளர்கள் ஹைட்ராலிக் வாகனம் மூலம் மீட்கப்பட்டதாக தீயணைப்பு துறை அதிகாரிகள் தெரிவித்தனர். மேலும் தீ விபத்து காரணமாக கட்டிடம் பலவீனம் அடைந்திருப்பதால் அந்த பகுதியே அபாயகரமானது என்று அறிவிக்கப்பட்டுள்ளது.