‘సైరా’ సెట్‌లో శుక్రవారం తెల్లవారుజామున భారీ అగ్ని ప్రమాదం జరిగింది. రంగారెడ్డి జిల్లా నార్సింగ్ పీఎస్ పరిధి కోకాపేటలోని మెగాస్టార్ చిరంజీవి ఫామ్ హౌస్‌లో ‘సైరా’ షూటింగ్‌ను గాను భారీ సెట్ వేశారు. గురువారం రాత్రి కూడా సినిమా షూటింగ్ జరిగింది. షూటింగ్ ముగియడంతో ఎక్కడి వాళ్లు అక్కడ వెళ్లిపోయారు. తెల్లవారుజామున జరిగిన ఈ ప్రమాదంలో భారీగా ఆస్తినష్టం వాటిల్లింది. అయితే ప్రమాదం జరిగిన సమయంలో జనాలు ఎవరూ లేకపోవడంతో ప్రాణనష్టమేమీ జరగలేదు. ఫామ్‌హౌస్ నుంచి దట్టమైన పొగలు, మంటలు ఒక్కసారిగా వ్యాపించడంతో అప్రమత్తమైన స్థానికులు పోలీసులు, అగ్నిమాపక సిబ్బంది సమాచారం అందించారు. హుటాహుటిన ఘటనాస్థలికి చేరుకున్న ఫైర్ సిబ్బంది శాయశక్తులా ప్రయత్నించి మంటలు ఆర్పింది. కాగా.. షార్ట్ సర్క్యూట్ వల్లే ఈ ప్రమాదం జరిగినట్లు తెలుస్తోంది. 

కాగా.. ఈ భారీ సెట్ సుమారు రూ.25కోట్లకు పైగా వెచ్చించి వేసినట్లు తెలుస్తోంది. అంతేకాదు ఇవాళ సాయంత్రం నుంచి కూడా షూటింగ్ జరగాల్సి ఉంది కానీ ప్రమాదం జరగడంతో రద్దు అయ్యింది. ఇదిలా ఉంటే సైరా సినిమా సెట్స్ మీదికెళ్లినప్పట్నుంచి ఏదో ఒక రూపంలో అడ్డంకులు ఏర్పడుతూనే ఉన్నాయి. ఇప్పటికే అన్నపూర్ణ స్టూడియోలో జరిగిన అగ్ని ప్రమాదంలో ‘మనం’ ‘సైరా’ కాలి బూడిదయ్యాయి. ఆ తర్వాత నగరంలోని శేరిలింగంపల్లిలో వేసిన సెట్‌కు ఎలాంటి అనుమతులు లేవని రెవెన్యూ అధికారులు కూల్చేసిన విషయం విదితమే. అయితే ఈ వరుస ఘటనల అనంతరం ఏకంగా తన ఫామ్‌ హౌస్‌లోనే సెట్ మార్పించారు చిరంజీవి. కాగా ఈ ఘటనకు సంబంధించి అటు చిత్రబృందం కానీ.. చిరంజీవి కానీ ఇంతవరకూ ఎవరూ స్పందించలేదు. ఈ ప్రమాదానికి సంబంధించి మరింత సమాచారం తెలియాల్సి ఉంది.

ఇదిలా ఉంటే.. భారీ బడ్జెట్‌తో తెరకెక్కుతున్న ఈ సినిమాలో చిరు, తమన్నా, నయనతార జంటగా నటిస్తున్నారు. ఈ చిత్రాన్ని సురేందర్ రెడ్డి తెరకెక్కిస్తుండగా.. చిరు కుమారుడు రామ్ చరణ్ సినిమా నిర్మిస్తున్నారు. కాగా.. బాలీవుడ్ బిగ్ బి అమితాబచ్చన్, విజయ్‌సేతుపతి, జగపతి బాబు, కిచ్చా సుదీప్ ఈ చిత్రంలో కీలకపాత్రల్లో నటిస్తున్న సంగతి తెలిసిందే