பைனான்சியர் அன்புச்செழியன் மிரட்டலால் சசிகுமாரின் உறவினர் அசோக்குமார் தற்கொலை செய்து கொண்டதாக கூறப்படும் நிலையில் போலீசார் மூன்று தனிப்படைகள் அமைத்து அவரை தேடி வருகின்றனர். இந்த நிலையில் சசிகுமார் தரப்பில் இருந்து சரியான ஒத்துழைப்பு இல்லை என்பதால் அன்புச்செழியனை பிடிக்க காலதாமதம் ஆவதாகவும் இதுகுறித்து சசிகுமார் நேரில் ஆஜராகி விளக்கம் அளிக்க வேண்டும் என்றும் போலீஸ் தரப்பில் கூறப்பட்டது

இதனையடுத்து நேரில் சசிகுமார் வளசரவாக்கம் காவல்நிலையத்தில் ஆஜரானார். பின்னர் செய்தியாளர்களை சந்தித்த சசிகுமார் 'உறவினர் அசோக்குமார் தற்கொலை விவகாரத்தில் எனக்கு தெரிந்த தகவலை போலீசாரிடம் கூறியுள்ளேன். பைனான்சியர் அன்புச்செழியன் மீது இன்னும் பலர் புகார் அளிப்பார்கள். அன்புச்செழியனுக்கு ஆதரவாக பலர் கருத்து கூறுவது அவர்களின் தனிப்பட்ட விருப்பம்' என்று கூறினார்

இந்த நிலையில் பைனான்சியர் அன்புச்செழியன் வெளிநாடு தப்பிவிடாமல் தடுக்க அனைத்து விமான நிலையங்களுக்கும் லுக் அவுட் நோட்டீஸ் அனுப்பப்பட்டுள்ளதாக கூறப்படுகிறது.