సూప‌ర్‌స్టార్ మ‌హేశ్ హీరోగా ప‌రశురామ్ ద‌ర్శ‌క‌త్వంలో రూపొందుతోన్న చిత్రం ‘సర్కారువారిపాట‌’. మ‌హేశ్ 27వ చిత్ర‌మిది. వ‌చ్చే ఏడాది సంక్రాంతికి విడుద‌ల‌వుతుంద‌ని యూనిట్ ప్ర‌క‌టించేసింది. రేప‌టి నుంచి దుబాయ్‌లో ఈ సినిమాకు సంబంధించిన కొత్త‌ షెడ్యూల్ ప్రారంభం అవుతుంది. ఏప్రిల్ 15 వ‌ర‌కు ఈ షెడ్యూల్ చిత్రీక‌ర‌ణ ఉంటుంది. ఇప్ప‌టికే దుబాయ్ ఫైట్‌, సాంగ్ స‌హా కీల‌క స‌న్నివేశాల చిత్రీక‌ర‌ణ‌ను యూనిట్ పూర్తి చేసింది. ఈ షెడ్యూల్ పూర్త‌యితే ఇక ఇండియాలో చిత్రీక‌రించాల్సిన షెడ్యూల్ మాత్ర‌మే మిగిలి ఉంటుంది.

ఈ సినిమాలో హీరో తండ్రి పాత్ర చాలా కీల‌కంగా ఉంటుంది. మ‌రి ఈ పాత్ర‌లో ఎవ‌రిని తీసుకోవాల‌ని యూనిట్ త‌ర్జ‌న‌భ‌ర్జ‌న‌లు ప‌డింది. చివ‌ర‌కు మ‌ల‌యాళ సీనియ‌ర్ న‌టుడు జ‌య‌రామ్‌ను హీరో తండ్రి పాత్ర‌కు ఎంపిక చేసుకున్నార‌ట‌. హీరో తండ్రిని మోసం చేసి బ్యాంకుల నుంచి కోట్ల రూపాయ‌లు కొల్ల‌గొట్టి విదేశాల‌కు పారిపోయిన విల‌న్‌ను ఇండియాకు రప్పించే హీరో క‌థే ఇది అని టాక్ వినిపిస్తోంది. కీర్తిసురేష్ హీరోయిన్‌గా న‌టిస్తుంది. మైత్రీ మూవీ మేక‌ర్స్, 14 రీల్స్ ప్ల‌స్‌, జీఎంబీ ఎంట‌ర్‌టైన్‌మెంట్ బ్యాన‌ర్స్‌పై సినిమా నిర్మిత‌మ‌వుతోంది.