பிரபல பாலிவுட் நடிகர் சுஷாந்த்சிங் அவர்கள் நேற்று மதியம் சுமார் இரண்டு மணி அளவில் திடீரென தனது வீட்டில் தூக்கில் தொங்கி தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியது. பாலிவுட் திரையுலகம் மட்டுமின்றி கிரிக்கெட் துறையில் பலரும் அவருக்கு இரங்கல் தெரிவித்து வந்தனர். சுஷாந்த்சிங் மரணத்தை இன்னும் தங்களால் ஜீரணிக்க முடியவில்லை என்று விராட் கோலி உள்பட பல கிரிக்கெட் பிரபலங்கள் கருத்து தெரிவித்திருந்தார்கள் என்பது குறிப்பிடத்தக்கது

இந்த நிலையில் நேற்று சுஷாந்த்சிங் மரணம் குறித்த செய்தி அறிந்ததும் போலீசார் முதல் கட்டமாக பிகார் மாநிலம் பாட்னாவில் உள்ள அவருடைய குடும்பத்தினருக்கு தகவல் தெரிவித்தனர். மகனின் மரணம் குறித்த செய்தி கேட்டதும் அவருடைய குடும்பத்தினர் ஆடிப்போய்விட்டார்கள். குறிப்பாக ஏற்கனவே இதய நோய் உள்ளிட்ட ஒரு சில நோய்களுக்கு சிகிச்சை பெற்றுவரும் சுஷாந்த்சிங் தந்தை கிருஷ்ணகுமார், மகனின் மரணச் செய்தி கேட்டு மயங்கி விழுந்ததாகவும் இதனை அடுத்து அவர் தற்போது பாட்னாவில் உள்ள மருத்துவமனையில் அனுமதிக்கப்பட்டுள்ளதாகவும் செய்திகள் வெளியாகி உள்ளது

சுஷாந்த்சிங் தந்தை உடல் நலம் குறித்து கருத்து கூறிய மருத்துவர்கள் அவர் தனது மகனின் மரணச் செய்தி கேட்டு அதிர்ச்சியில் பேச முடியாமல் இருப்பதாகவும் அவரது உடல்நிலை கவலைக்கிடமாக இருப்பதாகவும் தெரிவித்துள்ளது அதிர்ச்சி மேல் அதிர்ச்சியாக உள்ளது

இந்த நிலையில் ஊரடங்கிற்கு முன் சுஷாந்த்சிங் தனது சொந்த ஊரான பாட்னாவுக்கு வந்து குடும்பத்துடன் மகிழ்ச்சியாக இருந்ததாகவும் அப்போது அவருக்கு எந்தவிதமான மன அழுத்தமும் இல்லாமல் இருந்தது என்றும் குடும்பத்தினர் தெரிவித்துள்ளனர். ஊரடங்கு நேரத்தில் தான் திடீரென அவருக்கு மன உளைச்சல் ஏற்பட்டு இருப்பதாகவும் குடும்பத்தினர் கூறியிருப்பது பெரும் பரபரப்பை ஏற்படுத்தி உள்ளது