ఆరోగ్య శాఖ మంత్రి ఈటెల రాజేందర్ నివాసం కిటకిటలాడింది. మేం గులాబీ జెండాకు ఓనర్లం అంటూ వ్యాఖ్యలు చేసిన ఈటెల ను కలిసేందుకు టీఆర్ఎస్ నాయకులు, కార్యకర్తలు, అభిమానులు, పలు సంఘాల నేతలు, ప్రజాప్రతినిధులు తరలివచ్చారు. దీంతో మేడ్చల్ జిల్లా పూడుర్ లోని ఔటర్ రింగ్ రోడ్డు పక్కన ఉన్న ఈటెల నివాసం జనాలతో నిండిపోయింది.

ఉదయం ఏడు గంటల నుంచే అభిమానుల తాకిడి మొదలు కాగా... వారందరితో నూ కలిసి మాట్లాడారు. ఈ సందర్భంగా ఎమ్మెల్యే రసమయి బాలకిషన్ ఈటెలతో భేటీ అయ్యారు. పలు సంఘాల నేతలు ఈ సందర్భంగా ఆయనను సన్మానించారు.

మంత్రి పదవి కోల్పోతారని వార్తలు వస్తున్న నేపథ్యంలో .. మీడియాతో మాట్లాడేందుకు నిరాకరించారు. కెమెరాలు, ఫోన్లు లేకుండా లోపలికి రావాలని మంత్రి అనుచరులు సూచించారు. ఇలాంటి పరిస్థితుల్లో ఏం మాట్లాడలేరని తెలిపారు. అందరూ సహకరించాలని కోరారు.

మధ్యాహ్నం వరకు అభిమానులతో మాట్లాడిన మంత్రి ఈటెల ... ఆ తర్వాత ఓ కార్యక్రమానికి హాజరయ్యేందుకు సికింద్రాబాద్ బయలుదేరారు.