మా నాన్నగారికి ఆయనే అడ్వైజర్.. బీఏ రాజు మృతి పట్ల ప్రముఖ నిర్మాత
- IndiaGlitz, [Saturday,May 22 2021]
ప్రముఖ పీఆర్వో, జర్నలిస్ట్, నిర్మాత బీఏ రాజు అకాల మరణంతో టాలీవుడ్ మొత్తం విషాదంలో మునిగిపోయింది. శుక్రవారం అర్థరాత్రి ఆయన గుండెపోటుతో మరణించారు. దీనితో టాలీవుడ్ సెలెబ్రిటీలంతా బీఏ రాజు మృతి పట్ల సంతాపం తెలియజేస్తున్నారు.
ప్రముఖ నిర్మాత, కామాక్షి మూవీస్ సంస్థ అధినేత శివప్రసాద్ రెడ్డి తనయుడు చందన్ రెడ్డి బీఏ రాజు మృతి పట్ల దిగ్బ్రాంతి వ్యక్తం చేశారు. ఆయన మరణం టాలీవుడ్ కు తీరని లోటని అన్నారు.
బీఏ రాజుగారితో మా కుటుంబానికి 30 ఏళ్ల నుంచి అనుబంధం ఉంది. మా నాన్న శివప్రసాద్ రెడ్డిగారికి రాజుగారే అడ్వైజర్. ప్రారంభం నుంచి కామాక్షి మూవీస్ సంస్థకు బ్యాక్ బోన్ లా నిలిచారు. సినిమాలో అన్ని విభాగాలపైనా ఆయనకు అవగాహన ఉంది. చిత్ర పరిశ్రమతో పాటు మా కుటుంబానికి కూడా ఆయన మరణం లోటే. వారి కుటుంబ సభ్యులకు నా ప్రగాఢ సానుభూతి తెలియజేస్తున్నా అని చందన్ రెడ్డి అన్నారు.