స్టైలిష్‌స్టార్ అల్లు అర్జున్, వెర్సటైల్ డైరెక్టర్ సుకుమార్ కాంబినేషన్‌లో రూపొందుతోన్న చిత్రం ‘పుష్ప’. ఈ సినిమాను ట్రెండింగ్‌లో నిల‌ప‌డంలో బ‌న్నీ, సుక్కు అండ్ టీమ్ స‌క్సెస్ అవుతూనే ఉన్నారు. రీసెంట్‌గా ఈ సినిమాలో మెయిన్ విల‌న్ పాత్ర‌లో ఎవ‌రూ ఊహించ‌ని పేరుని తెర‌పైకి తీసుకొచ్చారు. ఆ పేరే ఫ‌హాద్ ఫాజిల్‌. జాతీయ అవార్డుల‌ను సైతం అందుకున్న ఈ మ‌ల‌యాళ విల‌క్ష‌ణ నటుడిని విల‌న్‌గా న‌టింప చేయ‌డానికి నిర్మాత‌లు భారీగానే ముట్ట‌చెప్పార‌ట‌. సినీ వ‌ర్గాల్లో వినిపిస్తోన్న స‌మాచారం మేర‌కు ఐదు కోట్ల రూపాయ‌ల రెమ్యున‌రేష‌న్‌ను ఇచ్చార‌ట‌. సుక్కు త‌న సినిమాల్లో విల‌న్స్‌ను స‌రికొత్త‌గా ఎలివేట్ చేస్తుంటాడు. ఇందులో ఫ‌హాద్ పాజిల్‌ను ఎలా ప్రెజంట్ చేస్తాడ‌నేది ఆస‌క్తిక‌రంగా మారింది.

శేషాచ‌ల అడ‌వుల్లో జరిగే ఎర్ర‌చంద‌నం స్మ‌గ్లింగ్ నేప‌థ్యంలో సాగే చిత్ర‌మిది. పుష్ప‌రాజ్ అనే లారీ డ్రైవ‌ర్ పాత్ర‌లో బ‌న్నీ క‌నిపించ‌బోతున్నాడు. ఇప్పటి వ‌ర‌కు బ‌న్నీ చేయ‌న‌టువంటి ఓ డిఫ‌రెంట్ లుక్‌ను ఈ సినిమా కోసం ట్రై చేస్తుండ‌టం విశేషం. మైత్రీ మూవీ మేక‌ర్స్‌, ముత్తం శెట్టి మీడియా సంస్థ‌లు ‘పుష్ప’ సినిమాను నిర్మిస్తున్నాయి. ప్యాన్ ఇండియా రేంజ్‌లో తెలుగు, హిందీ, త‌మిళ‌, క‌న్న‌డ‌, మ‌లయాళ భాష‌ల్లో రూపొందుతోన్న ఈ సినిమాను ఆగ‌స్ట్ 13న విడుద‌ల చేయ‌బోతున్నారు. ర‌ష్మిక మంద‌న్న హీరోయిన్‌గా న‌టిస్తోంది.