మాజీ మంత్రి మోకా శ్రీవిష్ణుప్రసాదరావు(90) ఆదివారం కన్నుమూశారు. గత కొన్ని నెలలుగా ఊపరితిత్తుల సమస్యతో ఆయన బాధపడుతున్నారు. ఈ క్రమంలోనే నాలుగు రోజుల క్రితం అమలాపురంలోని ఓ ప్రైవేటు ఆసుపత్రిలో కుటుంబ సభ్యులు ఆయనను చేర్పించారు. అక్కడ చికిత్స పొందుతూ శ్రీవిష్ణుప్రసాదరావు నేడు తుది శ్వాస విడిచినట్టు కుటుంబ సభ్యులు తెలిపారు. విష్ణుప్రసాదరావు స్వస్థలం తూర్పుగోదావరి జిల్లా కాట్రేనికోన.

శ్రీవిష్ణుప్రసాదరావు 18 సంవత్సరాల పాటు కాట్రేనికోన గ్రామ పంచాయతీకి సర్పంచ్‌గా సేవలందించారు. 1972లో తొలిసారిగా అల్లవరం నియోజకవర్గం నుంచి కాంగ్రెస్ పార్టీ తరుఫున ఎమ్మెల్యేగా పోటీ చేసి విజయం సాధించారు. 1977లో ఇందిరా కాంగ్రెస్ తరుఫున పోటీ చేసి రెండోసారి సైతం ఎమ్మెల్యేగా గెలుపొందారు. ఈ క్రమంలోనే ఆయన 1978లో మర్రి చెన్నారెడ్డి మంత్రివర్గంలో మార్కెటింగ్‌శాఖా మంత్రిగా పని చేశారు. శ్రీవిష్ణుప్రసాదరావు మృతి పట్ల పలువురు రాజకీయ ప్రముఖుుల సంతాపం వ్యక్తం చేశారు.