கடந்த சில நாட்களுக்கு முன்னர் த்ரிஷா பீட்டாவின் ஆதரவாளர் என்றும், அதன் உறுப்பினர் என்றும் கூறப்பட்டதால் ஜல்லிக்கட்டு போராட்டக்காரர்களிடம் இருந்து கடும் கண்டனங்கள் எழுந்தன. இந்நிலையில் தான் ஜல்லிக்கட்டுக்கு எந்தவிதத்திலும் எதிர்ப்பு தெரிவிக்கவில்லை என்றும் பீட்டாவுக்கு ஆதரவு தெரிவிக்கவில்லை என்றும் த்ரிஷா விளக்கம் அளித்தார். அதுமட்டுமின்றி சமூக வலைத்தளத்தில் இருந்தும் தற்காலிகமாக வெளியேறினார்.

மேலும் நேற்று நடைபெற்ற ஜல்லிக்கட்டுக்கு ஆதரவான தென்னிந்திய நடிகர் சங்கத்தின் போராட்டத்தில் அவர் கலந்து கொண்டு தனது ஆதரவை தெரிவித்தார். இந்நிலையில் தற்போது பீட்டா தரப்பில் இருந்து த்ரிஷாவுக்கு கண்டனம் எழுந்துள்ளது. ஒருபக்கம், நாய்களுக்கு ஏற்படும் கொடுமைகள் குறித்து பிரசாரம் செய்யும் த்ரிஷா இன்னொரு பக்கம் காளையை கொடுமை செய்யும் விளையாட்டை ஆதரிக்கின்றார். இது முரண்பாடாக உள்ளது என்று பீட்டா அமைப்பின் இயக்குநர் வி. மணிலால் கூறியுள்ளார்.

இருப்பினும் த்ரிஷா எங்களுடைய விளம்பரத் தூதர் கிடையாது என்று அவர் கூறியது த்ரிஷா மீது ஜல்லிக்கட்டு போராட்டக்காரர்களுக்கு இருந்த சந்தேகத்தை தீர்த்து வைத்துள்ளது என்பது குறிப்பிடத்தக்கது. மேலும் ஜல்லிக்கட்டு குறித்த பிற தகவல்களை த்ரிஷா உள்பட பல பிரபலங்களுக்கு வழங்க இருப்பதாகவும், அதன் பின்னர் ஜல்லிக்கட்டை ஆதரிப்பதோ அல்லது எதிர்ப்பதோ அவர்களுடைய முடிவு என்றும் மணிலால் தெரிவித்துள்ளார்.