மும்பையில் ஒரே ஒரு வீடு இருந்தாலே பணக்காரர் என்ற நிலையில் நான்கு வீடுகள் இருந்தும் பிச்சை எடுத்து வந்த முதிய பெண் ஒருவரை அவரது மருமகளே கழுத்தை நெரித்து கொலை செய்த சம்பவம் பெரும் அதிர்ச்சியை ஏற்படுத்தியுள்ளது.

மும்பையில் உள்ள சஞ்சனா என்ற 70 வயது பெண்ணின் கணவர் சில ஆண்டுகளுக்கு முன் இறந்து விட்டார். இவருக்கு குழந்தை இல்லாததால் கணவரின் சகோதரர் மகன் தினேஷ் என்பவரை தத்தெடுத்து வளர்த்து வந்தார். தினேஷுக்கு அஞ்சனா என்ற மனைவி உள்ளார்.

இந்த நிலையில் மூன்று வீடுகளை வாடகைக்கு விட்டுவிட்டு ஒரு வீட்டில் சஞ்சனா, தினேஷ் மற்றும் அஞ்சனா ஆகியோர் வாழ்ந்து வந்தனர். சஞ்சனா 70 வயதாகியும் அருகிலுள்ள ஜெயின் கோவிலில் பிச்சை எடுக்கும் தொழில் செய்து வந்தார். மேலும் பிச்சை எடுத்த பணத்தை அவர் எங்காவது மறந்து வைத்துவிட்டு மருமகள் அஞ்சனாவிடம் சண்டை போட்டு வந்ததாக தெரிகிறது. மேலும் சஞ்சனாவிடம் அவரது மருமகள் அஞ்சனா வீடுகளை தனது பெயரில் எழுதி வைக்கும்படி கூறியதாகவும் இதனால் இருவருக்கும் அடிக்கடி சண்டை வந்ததாகவும் தெரிகிறது.

இந்த நிலையில் திடீரென நேற்று சஞ்சனா மருத்துவமனையில் அனுமதிக்கப்பட்டார். அவரது தலையில் பலத்த காயம் ஏற்பட்டதை அடுத்து சிகிச்சை பலனின்றி அவர் இறந்துவிட்டார். சஞ்சனாவின் உடலில் இருந்த காயத்தை பார்த்த மருத்துவர்கள் இது குறித்து காவல் நிலையத்தில் புகார் அளித்தனர். காவல்துறை அதிகாரிகள் அஞ்சனாவை விசாரித்த போது தனது மாமியாரை கொலை செய்ததை ஒப்புக்கொண்டார்.

மாமியார் தன்னிடம் அடிக்கடி சண்டை போட்டதாகவும் தனது பெயரில் வீட்டை எழுதி கொடுக்க வலியுறுத்தியபோது முடியாது என்று கூறியதாகவும் அதனால் ஏற்பட்ட சண்டையில் ஆத்திரமடைந்து மாமியார் சஞ்சனாவை கிரிக்கெட் மட்டையால் அடித்ததாகவும் அதன் பின்னும் அவர் மரணம் அடையாததால் பாவாடை நாடா மற்றும் மொபைல் சார்ஜரை எடுத்து அவரது கழுத்தில் இறுக்கி கொலை செய்ததாகவும் வாக்குமூலம் கூறியுள்ளார். இதனை அடுத்து அஞ்சனாவை கைது செய்த போலீசார் அவரிடம் மேலும் விசாரணை செய்து வருகின்றனர்.