మాదక ద్రవ్యాల కేసు.. టాలీవుడ్‌ను ఓ కుదుపు కుదిపేసి.. తరువాత బాలీవుడ్‌లోనూ ప్రకంపనలు సృష్టించి చివరకు తిరిగి టాలీవుడ్‌ మెడకూ చుట్టుకుంటోంది. గతంలో తెలుగు హీరోలు, డైరెక్టర్స్, నిర్మాతలు, పలువురు జూనియర్ ఆర్టిస్టులను సైతం ఈ కేసులో విచారించడం జరిగింది. ఆ తర్వాత ఏం జరిగిందో ఏమోగానీ కేసు ఊసేలేదు. ఇక డ్రగ్స్ పీడ పోయిందబ్బా అనుకునే టైమ్‌కు.. మరోసారి టాలీవుడ్‌లో కలకలం రేపింది. బాలీవుడ్ ప్రముఖ నటుడు సుశాంత్ సింగ్ రాజ్‌పుత్ మృతి కేసును సీబీఐ అధికారులు విచారణ నిర్వహిస్తుండగా.. డ్రగ్స్ కోణం వెలుగు చూసింది. దీంతో కేసును ఎన్సీబీకి అప్పగించారు. అప్పట్లో ఎన్సీబీ విచారణలో ఇద్దరు, ముగ్గురు టాలీవుడ్ ప్రముఖ నటుల పేర్లు సైతం వినిపించాయి. ఈ మధ్య కొంత కాలంగా డ్రగ్స్‌కు సంబంధించిన అప్‌డేట్స్ అయితే ఏమీ లేవు. దీంతో మాదక ద్రవ్యాల సరఫరా పూర్తిగా ఆగిపోయిందని బాలీవుడ్, టాలీవుడ్ ఊపిరి తీసుకుంటున్న తరుణంలో సడెన్‌గా మరోమారు టాలీవుడ్ నటి శ్వేత కుమారి డ్రగ్స్‌తో పట్టుబడటం పెను సంచలనంగా మారింది.

సర్వత్రా ఉత్కంఠ..!

ఇదంతా జరిగింది హైదరాబాద్‌లో కాదు.. దేశ ఆర్థిక రాజధాని అయిన ముంబైలో కావడంతో మరింత హాట్ టాపిక్ అయ్యింది. ముంబై మీరా రోడ్డులోని ప్రముఖ హోటల్‌లో డ్రగ్స్‌తో పట్టుబడటంతో అసలు ఈమె వెనుక ఎవరున్నారని ఎన్సీబీ అధికారులు ఆరా తీస్తున్నారు. అయితే ఆమెను అదుపులోకి తీసుకున్న పోలీసులు విచారణకు గాను సోమవారం నాడు నార్కోటిక్స్ కంట్రోల్ బ్యూరో (ఎన్‌సిబి) కార్యాలయానికి తీసుకొచ్చారు. ముఖానికి దుపట్టాతో వచ్చిన ఆమె మీడియాకు ముఖం చూపించలేదు. మీడియా ప్రతినిధులు ఫొటోలు తీసుకోవడానికి కూడా శ్వేత ఛాన్స్ ఇవ్వలేదు. అయితే.. ప్రస్తుతం ఆమెను ప్రత్యేక బృందాలు విచారిస్తున్నాయి. విచారణలో ఈ హీరోయిన్ అటు బాలీవుడ్.. ఇటు టాలీవుడ్‌కు చెందిన ఏయే నటుల పేర్లు చెబుతుందో అనేదానిపై సర్వత్రా ఉత్కంఠ నెలకొంది.

ఎవరెవరు బయటపడతారో..!?

కాగా ఈ భామ తెలుగులో నాలుగు సినిమాల్లో నటించింది. సెకండ్ హీరోయిన్‌గా నటించిన ఈమె కొద్దిరోజులుగా అవకాశాల్లేవకపోవడంతో ముంబైలోనే మకాం వేసింది. అయితే అక్కడ ఛాన్స్‌లు దక్కించుకోవడానికి వెళ్లిందని అందరూ అనుకున్నారు కానీ సడన్‌గా ఇలా డ్రగ్స్‌తో రెడ్ హ్యాండెడ్‌గా పట్టుబడటంతో సంచలనంగా మారింది. అయితే.. ఇవాళ సాయంత్రంలోపు రెండు బృందాలు విచారించి అనంతరం అధికారులు మీడియా మీట్ పెట్టి వివరాలు వెల్లడించే అవకాశం ఉంది. ఇదిలా ఉంటే.. ముంబై నుంచి ఈ భామ టాలీవుడ్‌కు చెందిన ఎవరెవరికి డ్రగ్స్ సరఫరా చేసింది..? ఎన్నాళ్లుగా ఈ తంతు సాగుతోంది..? తేనెతుట్టను కదిలించినట్లుగా ఈమెను విచారిస్తే ఎవరెవరి పేర్లు బయటికొస్తాయి..? అనేదానిపై సినీ ప్రియులు, నెటిజన్లు ఎంతగానో వేచి చూస్తున్నారు. ఫైనల్‌గా ఏం జరుగుతోందో ఏమో..!