మద్యం మత్తులో కారు నడిపి నలుగురి చావుకు కారణమయ్యాడో వ్యక్తి. అనంతపురం జిల్లా పెనుగొండ మండలం అమ్మవారిపల్లి సమీపంలో ఘోర రోడ్డు ప్రమాదం చోటు చేసుకుంది. కియా కార్ల పరిశ్రమ ప్రధాన గేటు వద్ద 44వ జాతీయ రహదారిపై సోమవారం అర్ధరాత్రి ఈ ప్రమాదం జరిగింది. కియా గేటు వద్ద స్పీడ్ బ్రేకర్ ఉంది. ఒక కారు డ్రైవర్ ఆ స్పీడ్ బ్రేకర్ వద్దకు రాగానే స్లో చేశాడు. వెనుక నుంచి ఒక కారు అతి వేగంగా వచ్చి ఢీకొట్టింది. ఈ ప్రమాదంలో నలుగురు అక్కడికక్కడే మృతి చెందారు.

ప్రమాదానికి గురైన కారు బెంగుళూరు నుంచి హైదరాబాద్‌కు వెళుతుండగా ఈ దారుణం జరిగింది. ప్రమాదానికి గురైన కారు డ్రైవర్ చేతిలో బీర్ బాటిల్‌ను పోలీసులు గుర్తించారు. ఒక చేతిలో బీర్ బాటిల్‌తో మరో చేతితో స్టీరింగ్ పట్టుకుని.. మొత్తానికి దారుణమైన ఘోర ప్రమాదానికి సదరు డ్రైవర్ కారణమయ్యాడు. ఈ ప్రమాదంలో బెంగళూరుకు చెందిన మనోజ్ విట్టల్, అతనితో పాటు మరో ముగ్గురు మృతి చెందారు. కారును పక్కకు తీసి పోలీసులు ట్రాఫిక్‌ను పునరుద్ధరించారు.

మృతదేహాలను పెనుకొండ ప్రభుత్వ వైద్యశాలకు తరలించి.. వారి కుటుంబ సభ్యులకు పోలీసులు సమాచారం అందించారు. మృతిచెందిన వారిలో రేఖ కిషన్ గంజ్ నార్త్ దిల్లీ, ఆంచల్ సింగ్(21), మహబూబ్ ఆలం(31) ఆర్.టీ.నగర్ నార్త్ బెంగళూరు, మనోజ్ మిట్టల్ (38) ప్లాటినం సిటీ నార్త్ బెంగళూరు ఉన్నారు.