ஆட்டோவில் தவறுதலாக விட்டுச்சென்ற 50 பவுன் தங்க நகை! டிரைவர் செய்த நெகிழ்ச்சி செயல்!
- IndiaGlitz, [Friday,January 29 2021]
சென்னை, குரோம்பேட்டை பகுதியில் ஆட்டோவில் பயணம் செய்த பயணி ஒருவர் தவறுதலாக 50 பவுன் தங்க நகை வைக்கப்பட்டு இருந்த பையை ஆட்டோவிலேயே விட்டுச் சென்றுள்ளார். இதைக் கவனித்த ஆட்டோ டிரைவர் உடனடியாக குரோம்பேட்டை காவல் நிலையத்தில் ஒப்படைத்த சம்பவம் நெகிழ்ச்சியை ஏற்படுத்தி இருக்கிறது. இதனால் ஆட்டோ டிரைவர் சரவணக்குமாருக்கு பலரும் பாராட்டுகளைத் தெரிவித்து வருகின்றனர்.
குரோம்பேட்டை பகுதியில் வசித்து வரும் பால் பிரைட்டின் மகனுக்கு நேற்று முன்தினம் திருமணம் நடைபெற்று இருக்கிறது. இந்நிலையில் நேற்று அத்திருமணத்திற்கான வரவேற்பு நிகழ்ச்சிக்கும் ஏற்பாடு செய்து இருக்கிறார். குரோம்பேட்டை பகுதியில் உள்ள தேவாலயம் ஒன்றில் திருமண வரவேற்பு நிகழ்ச்சியை முடித்துக் கொண்டு வீட்டிற்கு திரும்பிய பால் பிரைட், சரவணக்குமாரின் ஆட்டோவில் சவாரி செய்து இருக்கிறார். அப்போது 50 பவுன் தங்க நகை வைக்கப்பட்டு இருந்த பையையும் உடன் எடுத்துச் சென்றிருக்கிறார்.
ஆனால் ஏதோ ஒரு நினைப்பில் தங்கம் வைக்கப்பட்டு இருந்த பையை ஆட்டோவிலேயே மறந்து விட்டு பால் பிரைட் வீட்டிற்கு சென்று விட்டார். பின்னர்தான் பை காணாமல் போய் இருப்பதை பால் பிரைட் உணர்ந்து இருக்கிறார். இதனால் பதறிப்போன அவர் குரோம்பேட்டை காவல் நிலையத்தில் புகார் அளித்தார். இதை விசாரித்த போலீஸார் சரவணக்குமாரின் ஆட்டோவை தேடி இருக்கின்றனர். இப்படி நடந்து கொண்டு இருக்கும்போதே சரவணக்குமார் திடீரென்று தங்கம் வைக்கப்பட்டு இருந்த பையைத் தூக்கிக்கொண்டு குரோம் பேட்டை காவல் நிலையத்திற்கு வந்து இருக்கிறார். உடனே அதை போலீஸாரிடமும் ஒப்படைத்து இருக்கிறார். இச்சம்பவம் பலரையும் நெகிழ்ச்சியில் ஆழ்த்தி இருக்கிறது.