ஆன்மீக அரசியல் இங்கு எடுபடாது: அமைச்சர் கடம்பூர் ராஜூ
- IndiaGlitz, [Tuesday,January 02 2018]
சூப்பர் ஸ்டார் ரஜினிகாந்த் கடந்த 31ஆம் தேதி அரசியலுக்கு வருவது உறுதி என்று அறிவித்ததோடு, அதற்கான பிரத்யேக இணையதளம் மற்றும் செயலி ஆகியவற்றையும் அறிமுகம் செய்துள்ளார். இதுவரை யாரும் கூறாத ஆன்மீக அரசியலை தான் கடைபிடிக்கவுள்ளதாகவும் அவர் தெரிவித்துள்ளார்.
இந்த நிலையில் ரஜினியின் அரசியல் பிரவேசம் குறித்து தமிழக அமைச்சர் கடம்பூர் ராஜூ கூறியபோது, 'தமிழகத்தில் ரஜினிகாந்த் அரசியலுக்கு வருவதால், திராவிட கட்சிகளுக்கு எந்த பாதிப்பும் இல்லை. திராவிட கட்சிகள் தான் எப்போதும் ஆட்சியில் இருக்கும். தமிழகத்தில் இதுவரை நடந்த அனைத்துத் தேர்தல்களிலும் இது நிரூபிக்கப்பட்டுள்ளது.
திராவிட பாரம்பரியம் மிக்க மண்தான் நமது தமிழகம். திராவிடத்திற்கு மாற்றாக எந்தக் கட்சியும் தமிழகத்தில் ஆட்சிக்கு வருவது இங்கு சாத்தியமில்லை. அதனால் ரஜினிகாந்த்தின் ஆன்மீக அரசியல் எதுவும் இங்கு எடுபடாது, என்று கூறியுள்ளார்
மேலும் புலியைப் பார்த்து பூனை சூடு போட்ட கொண்ட கதையாக புரட்சித் தலைவர் எம்ஜிஆரை நினைத்து நடிகர்கள் அரசியலுக்கு வருகிறார்கள். யாரும் இங்கு மீண்டும் எம்ஜிஆர் ஆகி விட முடியாது' என்று அமைச்சர் தெரிவித்தார்
அமைச்சரின் கூற்றுப்படி ஆன்மீக அரசியல் தமிழகத்தில் எடுபடாதா? அல்லது ரஜினியின் புதிய பாதை ஆச்சரியத்தை ஏற்படுத்துமா? என்பதை பொறுத்திருந்து பார்ப்போம்