బాబు మాట వింటే నట్టేట మునిగినట్లే.. జగన్‌కు చాన్సివ్వండి!
- IndiaGlitz, [Saturday,March 30 2019]
టీడీపీ అధినేత నారా చంద్రబాబుపై టాలీవుడ్ సీనియర్ నటుడు, వైసీపీ నేత మంచు మోహన్ బాబు మరోసారి తీవ్ర స్థాయిలో విమర్శలు గుప్పించారు. ఇటీవల వైసీపీ అధినేత వైఎస్ జగన్ సమక్షంలో ఆ పార్టీ కండువా కప్పుకున్న ఆయన టీడీపీపై ఓ రేంజ్‌లో విమర్శల వర్షం కురిపిస్తున్నారు. తాజాగా విజయవాడలోని వైసీపీ కార్యాలయంలో మీడియా మీట్ నిర్వహించిన ఆయన.. చంద్రబాబుపై తీవ్ర స్థాయిలో విమర్శలుగుప్పించి.. వైఎస్ జగన్‌ను ఆకాశానికెత్తేశారు.
నువ్వు లాక్కున్నావ్ బాబూ..?
చంద్రబాబుకంటే ముందే నేను టీడీపీలో ఉన్నా. టీడీపీ చంద్రబాబుది కాదు. వైసీపీ అధినేత వైఎస్ జగన్‌పై 36 కేసులన్నావ్.. 16 కేసులు కొట్టేశారు. నీ ప్రభుత్వం కేసులు లేవా..?. టీడీపీని నువ్వు లాక్కున్నావు. నీ మాయలోపడి అప్పట్లో మేం కూడా వచ్చాం. చంద్రబాబు రాజకీయ పునాది కాంగ్రెస్. ఎన్టీఆర్ మీద ఉన్నప్రేమతోనే టీడీపీలో కొనసాగుతున్నారు. చంద్రబాబు మాట వింటే నట్టేట మునిగినట్లే. మోదీ ఆంధ్రాకు వస్తే బేడీలు వేస్తానన్నారు.. మోదీతో చేతులు కలిపారు అని మోహన్ బాబు సంచలన ఆరోపణలు చేశారు.
మేలు చేయడానికే జగన్..
చంద్రబాబుది కుటుంబ పాలన. చంద్రబాబు దోచుకోవడానికి ఇసుకను కూడా వదల్లేదు. ఎన్టీఆర్ కుటుంబ సభ్యులు అమాయకులు.. వారిని మోసం చేశాడు. బాబు మాటలు నమ్మినవాడు ఎవడైనా మునగాల్సిందే. చంద్రబాబు ప్రజలను మోసం చేస్తున్నాడు. చంద్రబాబుకు యూటర్న్ తీసుకోవడం తప్ప అభివృద్ధి చేయలేదు. ప్రజలకు మేలు చేయడానికే వైఎస్ జగన్ వస్తున్నారు. ఒక్కసారి జగన్‌కి చాన్స్ ఇవ్వండి.. ఆయనేంటో నిరూపించుకుంటారు. వైఎస్ జగన్‌కు అనుభవం లేకపోవచ్చు.. మరి మొదటగా చంద్రబాబుకు అనుభవం ఉందా..? అని చంద్రబాబుపై మోహన్ బాబు ప్రశ్నల వర్షం కురిపించారు.
అయితే టీడీపీపై, చంద్రబాబుపై చేసే ప్రతి విమర్శకు వరుసగా మీడియా మీట్‌లు పెట్టి మరీ తెలుగు తమ్ముళ్లు, ప్రచార సభల్లో చంద్రబాబు స్ట్రాంగ్ కౌంటర్లు ఇస్తూ వస్తున్నారు. మోహన్ బాబు తాజా వ్యాఖ్యాలపై తమ్ముళ్లు ఎలా రియాక్టవుతారో వేచి చూడాల్సిందే.