எங்களையும் இந்தி படங்களை பார்க்க வைத்து விடுவார்களோ? கனிமொழி எம்பி
- IndiaGlitz, [Wednesday,January 08 2020]
மத்திய அரசு சமீபத்தில் அமல்படுத்திய குடியுரிமை சீர்திருத்த சட்டத்திற்கு எதிராக டெல்லியில் ஜே.என்.யூ மாணவர்கள் தொடர் போராட்டம் நடத்தி வந்தனர். இந்த நிலையில் கடந்த இரண்டு நாட்களுக்கு முன்னர் அங்கு மாணவர்கள் மீது கண்மூடித்தனமான தாக்குதலை மர்ம நபர்கள் சிலர் நடத்தினர். இந்த தாக்குதலுக்கு அனைத்து அரசியல் கட்சிகளும் கண்டனம் தெரிவித்து வருகின்றனர். ஒரு சிலர் நேரில் சென்று தாக்குதலுக்கு ஆளான மாணவர்களுக்கு ஆறுதல் கூறி வருகின்றனர்.
அந்த வகையில் இன்று திமுக எம்பி கனிமொழி அவர்கள் காயமடைந்த மாணவ மாணவிகளுக்கு நேரில் சென்று ஆறுதல் தெரிவித்து, மாணவர்களின் போராட்டத்துக்கு திமுக எப்போதும் ஆதரவாக இருக்கும் என்று கூறினார்.
இந்த நிலையில் செய்தியாளர்களிடம் அவர் பேட்டி அளித்த போது ’மாணவர்களுக்கு ஆதரவாக போராடிய நடிகை தீபிகா படுகோனே’ நடித்த ‘சப்பக்’ என்ற திரைப்படத்தை புறக்கணிக்க வேண்டும் என்று ஒரு சிலர் கூறி வருவது குறித்து கேள்விக்கு பதில் கூறிய கனிமொழி ’நாங்கள் எப்போதும் இந்தி திரைப்படங்களை பார்ப்பதில்லை ஆனால் தீபிகாவுக்கு ஆதரவு தெரிவிப்பதற்காக எங்களையும் ஹிந்தி படங்களை பார்க்க வைத்து விடுவார்கள் போல் தெரிகிறது’ என்று கூறினார்.