కేసీఆర్‌కు హరీష్‌రావే టార్గెట్.. డీకే సంచలన వ్యాఖ్యలు
- IndiaGlitz, [Friday,July 26 2019]
టీఆర్ఎస్ అధినేత, తెలంగాణ సీఎం కేసీఆర్‌కు.. మాజీ మంత్రి సిద్దిపేట ఎమ్మెల్యే హరీష్ రావే టార్గెట్ అని బీజేపీ మహిళా నేత, మాజీ మంత్రి డీకే అరుణ సంచలన వ్యాఖ్యలు చేశారు. గురువారం నాడు మాజీ మంత్రి డీకే అరుణ మీడియాతో చిట్ చాట్ నిర్వహించారు. ఈ సందర్భంగా హరీశ్ గురించి మాట్లాడిన ఆమె తీవ్ర దుమారం రేపే వ్యాఖ్యలు చేశారు. హరీశ్‌ను దెబ్బ తీయాలనే చింతమడకలో ఇటీవల సీఎం కేసీఆర్ పర్యటించి స్వగ్రామంపై వరాలు జల్లు కురిపించారన్నారు. ‘నేనే రాజు.. నేనే మంత్రి’ అన్నట్లుగా కేసీఆర్ ప్రవర్తిస్తున్నారని డీకే విమర్శలు గుప్పించారు.
జూపల్లి బీజేపీలోకి ఎందుకు రాలేదంటే..!!
కాగా.. జూపల్లి కృష్ణారావు టీఆర్ఎస్‌కు టాటా చెప్పేసి బీజేపీ తీర్థం పుచ్చుకుంటారని గత కొన్నిరోజులుగా పెద్ద ఎత్తున వార్తలు వస్తున్న సంగతి తెలిసిందే. అయితే ఏం జరిగిందో ఏమోగానీ ఆయన కాషాయ కండువా కప్పుకోలేదు.. అంతేకాదు.. పార్టీ మార్పుపై ఇంతవరకూ ఒక్కసారి కూడా స్పందించలేదు. అయితే ఈ వ్యవహారంపై తాజాగా డీకే అరుణ మాట్లాడుతూ.. జూపల్లి ఎక్కడికెళ్లినా జరిగేదేమీ లేదన్నారు. కార్యకర్తల ఒత్తిడితోనే సునీతా లక్ష్మారెడ్డికి బీజేపీలోకి రాలేదని ఆమె వ్యాఖ్యానించారు. బీజేపీ పట్ల తెలంగాణ ప్రజల్లో నమ్మకం ఏర్పడిందని.. రాష్ట్ర బీజేపీలో మార్పులు రావాల్సిన అవసరముందన్నారు. టీఆర్ఎస్ నేతల భూములున్న చోటే ప్రభుత్వ భవనాల నిర్మాణం చేస్తోంది డీకే అరుణ విమర్శలు గుప్పించారు.