பிரபல நடிகர் சத்யராஜின் மகள் திவ்யா ஒரு நியூட்ரியனிஸ்ட் என்பதும் அவர் உலகப் புகழ் பெற்ற 'அக்சய பாத்திரம்' என்னும் தொண்டு நிறுவனத்தின் நல்லெண்ண தூதராக சேவை செய்து வருகிறார் என்பதும் தெரிந்ததே. இந்த தொண்டு நிறுவனம் ஏராளமான பள்ளி குழந்தைகளுக்கு சத்துள்ள மதிய உணவை வழங்கி வருகிறது என்பது குறிப்பிடத்தக்கது

இந்த நிலையில் திவ்யா சமீபத்தில் தமிழக பள்ளிக்கல்வி அமைச்சர் செங்கோட்டையனை சந்தித்துள்ளார். 'அக்சய பாத்திரம்' என்னும் தொண்டு நிறுவனம் மூலம் தற்போது பல பள்ளிகளுக்குக் மதிய உணவு வழங்கி வருவதாகவும், இதனையடுத்து அரசு பள்ளிகளிலும் சத்தான உணவு வழங்க தங்கள் தொண்டு நிறுவனத்தை அனுமதிக்க வேண்டும் என்றும் அவர் அமைச்சர் செங்கோட்டையனிடம் கேட்டு கொண்டதாக செய்திகள் வெளிவந்துள்ளது.

இதுகுறித்து திவ்யா கூறியபோது, 'அனைத்து குழந்தைகளுக்கும் சத்தான உணவு கிடைக்க வேண்டும் என்பதே 'அக்சய பாத்திரம்' நிறுவனத்தின் குறிக்கோள் என்றும், தமிழகத்தில் அரசு பள்ளிகளில் பயிலும் குழந்தைகள் பெரும்பாலானோர் சரியான ஊட்டச்சத்து மிக்க உணவுகள் கிடைக்காமல் உள்ளதாகவும், அதுகுறித்து அமைச்சரிடம் பேசியதாகவும் தெரிவித்தார்.