தனுஷ்-வெற்றிமாறன் தயாரிப்பில், வெற்றிமாறன் இயக்கிய 'விசாரணை' திரைப்படம் குறித்து பத்திரிகையாளர்களுக்கான அறிக்கை ஒன்றை பிரபல இயக்குனர் ஏ.எல்.விஜய் வெளியிட்டுள்ளார். அதில் அவர் கூறியிருப்பதாவது:

இயக்குனர் வெற்றிமாறனின் 'விசாரணை திரைப்படத்தை அமெரிக்காவில் பார்த்தேன். இந்த திரைப்படம் இந்தியாவின் மிகச்சிறந்த படங்களில் ஒன்று. படம் பார்த்து முடித்தபிறகு எனக்கு பேச்சே எழவில்லை. வெற்றிமாறன் இந்த படத்தின் கதை, திரைக்கதை மற்றும் கேரக்டர்களை கையாண்ட விதம் அபாரமானது. இந்த படத்தில் நடித்துள்ள தினேஷ், சமுத்திரக்கனி உள்பட் அனைவரின் நடிப்பும் பாராட்டுக்குரியது.

இந்த படத்தின் மூலம் இந்திய சினிமா, உலக அரங்கில் ஒரு அடையாளம் பெறும். வெற்றிமாறன் மற்றும் அவரது படக்குழுவினர்களுக்கு எனது வாழ்த்துக்கள். உலக தரத்தில் சினிமாக்கள் தயாராகும் தமிழ் சினிமாவில் நானும் ஒரு அங்கம் என்பதை நினைக்கவே பெருமையாக இருக்கின்றது. இந்த படத்தை ரிலீஸாகும் முன்பே பார்க்கும் சந்தர்ப்பம் எனக்கு கிடைத்தது எனது அதிர்ஷ்டமே. தியேட்டரில் ரிலீஸாகும்பொது இந்த படத்தை பார்க்க யாரும் தவற வேண்டாம். இவ்வாறு இயக்குனர் விஜய் கூறியுள்ளார்.

தினேஷ், ஆனந்தி, சமுத்திரக்கனி, கிஷோர் உள்பட பலர் நடித்துள்ள இந்த திரைப்படத்திற்கு ஜி.வி.பிரகாஷ் இசையும், ராமலிங்கம் ஒளிப்பதிவும், கிஷோர் படத்தொகுப்பும் செய்துள்ளனர். இந்த படம் வரும் அக்டோபரில் ரிலீஸாகும் என எதிர்பார்க்கப்படுகிறது