డైరెక్టర్ తేజ త్వరలోనే డిజిటల్ మీడియంలోకి అడుగు పెట్టబోతున్నారు. సినీ వ‌ర్గాల స‌మాచారం మేర‌కు ప్రముఖ డిజిట‌ల్ మీడియం సంస్థ అమెజాన్ ప్రైమ్ చ‌ర్చ‌లు జ‌రిపింద‌ట‌. రెండు సినిమాలు, మూడు వెబ్ సిరీస్‌లు రూపొందించేలా అమెజాన్ సంస్థ తేజ‌తో చ‌ర్చ‌లు జ‌రిపింద‌ట‌. బోల్డ్ కంటెంట్‌తో ప్రేక్ష‌కుల ముందుకు వెబ్ సిరీస్‌ల‌ను రూపొందించే ఈ సంస్థ‌లో తేజ ఎలాంటి బోల్డ్ కంటెంట్‌తో సినిమా చేస్తాడో వేచి చూడాలి.

డైరెక్ట‌ర్ తేజ ఒక‌ప్పుడు చిత్రం, నువ్వు నేను, జ‌యం వంటి ప్రేమ‌క‌థా చిత్రాల‌తో వ‌రుస విజయాల‌ను అందుకున్నాడు. ల‌వ్‌స్టోరీస్‌ను తెర‌కెక్కించ‌డంలో దిట్ట‌గా పేరు సంపాదించుకున్నాడు. అయితే ఆ త‌ర్వాత స‌క్సెస్‌ల‌ను సాధించ‌డంలో వెనుక‌బ‌డ్డాడు. ఇక తేజ అనే డైరెక్ట‌ర్ లేడేమో అని అనుకుంటున్న స‌మ‌యంలో `నేనే రాజు నేనే మంత్రి` సినిమాతో స‌క్సెస్ సాధించి మ‌ళ్లీ త‌న ఉనికిని చాటుకున్నాడు. సీనియ‌ర్ ఎన్టీఆర్ బ‌యోపిక్ `య‌న్‌.టి.ఆర్‌`ను తెర‌కెక్కించాల్సింది కానీ.. ఆ ప్రాజెక్ట్ నుండి త‌ప్పుకున్నాడు. కానీ త‌ర్వాత తేజ తెర‌కెక్కించిన `సీత‌` బాక్సాఫీస్ వ‌ద్ద డిజాస్ట‌ర్ అయ్యింది. ఈయ‌న త‌దుప‌రి సినిమాల‌పై ప‌లు వార్త‌లు వ‌చ్చాయి. సినిమా విష‌యానికి వ‌స్తే గోపీచంద్‌తో ఓ సినిమా, రానాతో ఓ సినిమాను తెరకెక్కించే ప్ర‌ణాళిక‌లు వేస్తున్నాడు తేజ‌.