రాజ‌మౌళిపై సంచ‌ల‌న ఆరోప‌ణ‌లు చేసిన ద‌ర్శ‌కుడు
- IndiaGlitz, [Friday,April 24 2020]
ద‌ర్శ‌క‌ధీరుడు ఎస్‌.ఎస్‌.రాజ‌మౌళి.. ప్ర‌త్యేక ప‌రిచ‌యం అక్క‌ర్లేదు పేరిది. ఈ స్టార్ డైరెక్ట‌ర్ ప్ర‌స్తుతం తార‌క్‌, చ‌ర‌ణ్‌ల‌తో రౌద్రం ర‌ణం రుధిరం సినిమాను రూపొందిస్తోన్న సంగ‌తి తెలిసిందే. అయితే క‌రోనా ప్ర‌భావంతో ఈ సినిమా తాజా షెడ్యూల్ ఆగింది. అందరిలాగానే లాక్‌డౌన్‌లో క్వారంటైన్ స‌మ‌యాన్ని రాజ‌మౌళి ఇంటి ప‌నులు చేయ‌డ‌మే కాకుండా.. పుస్త‌కాలు చ‌దువుతూ త‌న‌కు న‌చ్చిన సినిమాలు చూస్తూ గ‌డుపుతున్నారు. అయితే రీసెంట్ ఇంట‌ర్వ్యూలో ఆయ‌న ఆస్కార్ అవార్డ్ గెలుచుకున్న పార‌సైట్ చిత్రం గురించి మాట్లాడుతూ త‌న‌కు ఆ చిత్రం న‌చ్చ‌లేదంటూ బోర్ కొట్టింద‌ని ఓ సంద‌ర్భంలో కునుకు కూడా తీశాన‌ని చెప్పారు. అయితే ఆస్కార్ విన్నింగ్ మూవీ గురించి రాజ‌మౌళి అలా ప్ర‌స్తావించ‌డంతో కొంద‌రు నెటిజ‌న్స్ రాజ‌మౌళిని ట్రోలింగ్ చేయ‌డం ప్రారంభించారు.
అయితే మిఠాయి అనే డిజాస్ట‌ర్ సినిమాను తెర‌కెక్కించిన ద‌ర్శ‌కుడు ప్ర‌శాంత్ కుమార్ ఓ అడుగు ముందుకేసి రాజ‌మౌళిని గ‌ట్టిగానే విమ‌ర్శించాడు. ఆస్కార్ అవార్డ్ గెలుచుకున్న సినిమా గురించి రాజ‌మౌళి అలా మాట్లాడ‌టం త‌గ‌ద‌ని ప్ర‌శాంత్ అన్నారు. అంతే కాకుండా పార‌సైట్ చిత్రాన్ని ప్ర‌పంచంలోని ప్ర‌ముఖ ద‌ర్శ‌కులంద‌రూ మెచ్చుక‌న్నార‌ని, కానీ రాజ‌మౌళి తెర‌కెక్కించిన బాహుబ‌లిని ఎవ‌రూ మెచ్చుకోలేద‌ని ఆయ‌న తెలిపారు. ఇక పార‌సైట్ ఒరిజినాలిటీ కంటెంట్ అని, అదే రాజ‌మౌళి సై సినిమాతో పాటు ఆయ‌న సినిమాల్లో చాలా స‌న్నివేశాల‌ను కాపీ కొట్టార‌ని అలాంటి డైరెక్ట‌ర్ పార‌సైట్‌ను కామెంట్ చేయ‌కూడ‌ద‌ని ప్ర‌శాంత్ కుమార్ తెలిపారు.