எதற்கெடுத்தாலும் போராட்டம் என்றால் தமிழ்நாடே சுடுகாடாகிவிடும் என்று நேற்று நடிகர் ரஜினிகாந்த் ஆவேசமாக சென்னை விமான நிலையத்தில் அளித்த பேட்டியில் கூறிய நிலையில் அவர் நடித்த 'கபாலி' மற்றும் 'காலா' படங்களை இயக்கிய இயக்குனர் ரஞ்சித், 'ஒவ்வொரு உரிமையையும் போராடித்தான் பெற முடியும் என்று சற்றுமுன் பேட்டி அளித்துள்ளது பெரும் பரபரப்பை ஏற்படுத்தியுள்ளது.

இன்று இயக்குனர் ரஞ்சித் செய்தியாளர்களிடம் பேசியபோது, போராட்டம் வேண்டாம் என்று கூறுவது ரஜினியின் சொந்த கருத்து. நானும் இப்போது போராட்டத்தில் தான் இருக்கின்றேன். போராட்டத்தின் மூலம் தான் நம்முடைய பிரச்சனைகள் தீரும் என்று கூறினார்.

மேலும் ரஜினிகாந்த் போராட்டமே வேண்டாம் என்று கூறவில்லை, நான் இன்று காலையில் அவரிடம் பேசியபோது போராட்டங்கள் நடக்கும்போது ஏற்படும் அசம்பாவிதங்களால் அதன் வலி அதிகம் ஏற்படுகிறது என்ற வருத்தத்தை அவர் என்னிடம் தெரிவித்தார்.

போராட்டமே கூடாது என்றால் நான் இங்கு வந்திருக்க வேண்டிய அவசியம் இல்லை. ஒவ்வொரு உரிமையையும் போராடித்தான் பெறமுடியும் என்று கூறினார்.