ఎప్పుడూ తన పనేదో తాను చూసుకుని.. వున్నంతసేపు తన ఎనర్జీ, పంచులతో అందరినీ నవ్వించే మాస్ మాహారాజా రవితేజ చేసిన వ్యాఖ్యలు ఇప్పుడు టాలీవుడ్‌లో కలకలం రేపుతున్నాయి. ఆయన నటించిన తాజా చిత్రం ‘‘ఖిలాడీ’’ సినిమా ప్రీ రిలీజ్ ఈవెంట్ ఇటీవల గ్రాండ్‌గా జరిగింది. ఈ సందర్భంగా దర్శకుడు రమేశ్ వర్మపై రవితేజ చేసిన వ్యాఖ్యలు.. ఇద్దరి మధ్య ఏదో జరిగిందన్న సంకేతాలు అటు అభిమానులు, ఇటు పరిశ్రమకు వెళ్లాయి. ఆ స్టేజ్‌పై రమేశ్ వర్మను కాకుండా.. ఎంతసేపు నిర్మాత కోనేరు సత్యనారాయణనే ప్రస్తావించారు రవితేజ. రచయిత శ్రీకాంత్ విస్సా కారణంగానే ‘‘ఖిలాడీ’’ చేయడానికి ఒప్పుకున్నానంటూ ఆయన చేసిన వ్యాఖ్యలు దుమారం రేపుతున్నాయి. అంతేనే సినిమాకు సంబంధించి మీరే అన్ని విషయాలు దగ్గరుండి చూసుకోవాల్సింది అంటూ కోనేరు సత్యనారాయణతో అనడం చూస్తుంటే.. రమేశ్‌తో బాగా ఫైట్ జరిగిందని అర్ధమవుతోంది.

ఇక ఈ గొడవ జరుగుతున్న తరుణంలోనే రమేష్ వర్మ భార్య రేఖా వర్మ సీన్‌లోకి ఎంటరయ్యారు. రవితేజను ఉద్దేశిస్తూ ఇన్‌డైరెక్ట్‌గా ఆమె కామెంట్స్ చేయడంతో ఈ వ్యవహారం టాలీవుడ్‌లో మరింత హాట్ టాపిగ్గా మారింది. శుక్రవారం ఆమె తన ఇన్‌స్టాగ్రామ్ స్టోరీలో రవితేజను ఒక చీప్‌స్టార్ అంటూ సంచలన వ్యాఖ్యలు చేశారు. అంతేకాదు ‘అరటిపండ్లు మీకు బాగా వచ్చు అనుకుంట తీయడం. డైరెక్టర్ గారు నెక్స్ట్ టైం క్లాసెస్ తీసుకోండి RT దగ్గర.. అరటిచెట్టు నరికి ఇచ్చినా సరిపోలేదు RTకి. డైరెక్టర్‌కి ఒక స్టైల్ ఉంటుంది అది మీకు చెప్పి చేయిస్తేనే కెమెరాలో యంగ్ అండ్ స్టైలిష్ గా కనిపిస్తావ్...క్రెడిట్ గోస్ టు డైరెక్టర్’ అంటూ రేఖా వర్మ తన ఇన్‌స్టా స్టోరీలో పెట్టారు. కొసమెరుపుగా ‘మాస్ నే క్లాస్ చేసిన డైరెక్టర్, థియేటర్లో కనిపిస్తుంది రమేష్ గారు మీ వాల్యూస్ రేపు థియేటర్లో కలుద్దాం’ అంటూ చెప్పారు రేఖ.

గతంలో దర్శకుడు అజయ్ భూపతి కూడా ఇదే మాట రవితేజని ఎందుకు అన్నాడో ఇప్పుడు అర్ధమవుతుంది అని రేఖావర్మ అనడం కూడా ఇప్పుడు కలకలం రేపుతోంది. అసలు రవితేజకు, రమేష్ వర్మకు మధ్య ఏం జరిగింది అన్నది తెలియకుండా వుంది. ఇదే సమయంలో రేఖా వర్మ సైతం ఈస్థాయిలో రియాక్ట్ అవ్వడం కూడా అనేక ప్రశ్నలకు తావిస్తోంది. రవితేజ.. రమేష్ వర్మ కాంబినేషన్లో 2011లో వీర అనే సినిమా వచ్చింది. కానీ అది ఫ్లాప్ అయ్యింది. ఆ తర్వాత ఇన్నేళ్లకు మళ్లీ వీరిద్దరి కాంబోలో ఖిలాడీ వచ్చింది. హ్యాపీగా వుండాల్సిన సమయంలో ఈ గొడవ ఎక్కడికి దారి తీస్తుందా అని ప్రేక్షకులు భయపడుతున్నారు.