மணிகண்டனின் அடுத்த படம் ஹாலிவுட் ரீமேக்?
- IndiaGlitz, [Saturday,September 03 2016]
'காக்கா முட்டை' படத்தின் மூலம் கோலிவுட் திரையுலகிற்கு அறிமுகமான இயக்குனர் மணிகண்டன், முதல் படத்திலேயே உலக அளவில் பிரபலம் பெற்றார். இந்த படம் தேசிய விருது உள்பட பல சர்வதேச விருதுகளை குவித்தது.
இந்நிலையில் மணிகண்டன் இயக்கிய 2வது படமான 'குற்றமே தண்டனை' நேற்று வெளியாகி நல்ல வரவேற்பை பெற்றுள்ளது. பத்திரிகை விமர்சனங்கள் இந்த படத்திற்கு பாசிட்டிவ் ஆக வந்து கொண்டிருப்பதால் இந்த படமும் வெற்றி என்றே கருதப்படுகிறது. மேலும் மணிகண்டன் தற்போது விஜய்சேதுபதி, ரித்திகாசிங் நடிப்பில் 'ஆண்டவன் கட்டளை' என்ற படத்தை இயக்கி வருகிறார். பாஸ்போர்ட் பெறுவதில் ஏற்படும் நடைமுறை சிக்கல் குறித்து அலசும் இந்த படத்தை ஈராஸ் நிறுவனம் தயாரித்து வருகிறது.
இந்நிலையில் தான் ஒரு ஹாலிவுட் படத்தின் ரீமேக் உரிமையை பெற்று வைத்துள்ளதாகவும், அதற்கான திரைக்கதையை எழுத ஆரம்பித்துள்ளதாகவும் விரைவில் இந்த படத்தின் அறிவிப்பு வெளிவரும் என்றும் மணிகண்டன் சமீபத்தில் கூறியுள்ளார். ஆனால் எந்த ஹாலிவுட் படம் என்பதை அவர் சஸ்பென்ஸ் ஆக வைத்துள்ளதால் அந்த படம் குறித்த தகவலை அறிய அனைவரும் ஆர்வத்துடன் உள்ளனர்.