'லெஜண்ட் சரவணன்' படத்தை இயக்குவது தனுஷ் பட இயக்குனரா? அவரே கூறிய விளக்கம்..!
- IndiaGlitz, [Thursday,February 08 2024]
பிரபல தொழிலதிபர் 'லெஜண்ட் சரவணன் நடித்த 'லெஜண்ட் 'என்ற திரைப்படம் கடந்த 2022 ஆம் ஆண்டு வெளியாகி சுமாரான வரவேற்பு பெற்ற நிலையில் அவர் நடிக்க இருக்கும் அடுத்த படம் குறித்த அறிவிப்பு விரைவில் வெளியாகும் என்று எதிர்பார்க்கப்படுகிறது. கடந்த சில நாட்களுக்கு முன்னர் கூட 'லெஜண்ட் சரவணன் தனது சமூக வலைதள பக்கத்தில் அடுத்த பட அறிவிப்பை விரைவில் வெளியிடுவேன் என்று கூறியிருந்தார்.
இந்த நிலையில் 'லெஜண்ட் சரவணன் நடிக்கும் அடுத்த திரைப்படத்தை இயக்குனர் துரை செந்தில்குமார் இயக்க இருப்பதாக வெளியான செய்தியை ஏற்கனவே பார்த்தோம். தனுஷ் நடித்த ’கொடி’ சிவகார்த்திகேயன் நடித்த ’எதிர்நீச்சல்’ உள்ளிட்ட படங்களை இயக்கிய துரை செந்தில்குமார் கூறிய கதை லெஜன்ட் சரவணனுக்கு பிடித்து விட்டதாகவும் விரைவில் இந்த படம் குறித்த அறிவிப்பு வெளியாகும் என்றும் கூறப்பட்டது.
இந்த நிலையில் சமீபத்தில் பேட்டி அளித்த துரை செந்தில்குமார் ’நான் 'லெஜண்ட் சரவணன் அவர்களிடம் சொன்ன கதை அவருக்கு பிடித்தது என்பது உண்மைதான், அவரும் நாம் சேர்ந்து ஒரு படம் பண்ணலாம் என்று சொன்னார். அப்போது நான் ஒரு ஐடியாவை சொன்னேன், நான் சொன்ன ஐடியா அவருக்கு பிடித்திருந்தது, ஆனால் இன்னும் நிறைய வேலைகள் இருக்கு, பொறுத்திருந்து பார்ப்போம்’ என்று கூறியுள்ளார்.
இதனை அடுத்து 'லெஜண்ட் சரவணன் படத்தை துரை செந்தில் குமார் இயக்குவது கிட்டத்தட்ட உறுதி செய்யப்பட்டுள்ளது.