മമ്മൂട്ടിയോടൊപ്പമുള്ള സിനിമ ആലോചിക്കുന്നുണ്ടെന്ന് സംവിധായകനും നടനുമായ ദിലീഷ് പോത്തൻ. സിനിമയുമായി ബന്ധപ്പെട്ട് മമ്മൂട്ടിയുമായി നിരവധി ചര്‍ച്ചകള്‍ നടത്തിയെന്നും എന്നാല്‍ തിരക്കഥ ഉറപ്പിച്ചിട്ടില്ല എന്നും അദ്ദേഹം പറഞ്ഞു. വരാനിരിക്കുന്ന ഒരു പ്രോജക്റ്റില്‍ മോഹന്‍ലാലുമായും പ്രവര്‍ത്തിക്കാന്‍ ആഗ്രഹിക്കുന്നുവന്നും സംവിധായകന്‍ കൂട്ടിച്ചേര്‍ത്തു. മമ്മൂക്കയുമായി ഞാൻ ചില ആശയങ്ങളൊക്കെ പങ്കുവച്ചിട്ടുണ്ട്. ഇപ്പോൾ ചർച്ചകൾ നടക്കുന്നുണ്ടെന്നും പറയാം. എന്നാൽ ഇതുവരേയ്ക്കും ഒരു തിരക്കഥ എഴുതാൻ പറ്റിയ നിലയിലേക്ക് കാര്യങ്ങളെത്തിയിട്ടില്ല. മമ്മൂട്ടിയുമായി മാത്രമല്ല മോഹൻലാലുമായി ഒരു സിനിമ ചെയ്യണമെന്ന ആഗ്രഹവും എനിക്കുണ്ട്. പക്ഷെ ഒരു തീരുമാനത്തിലേക്കും ചർച്ചകൾ നയിച്ചിട്ടില്ലെന്നതാണ് സത്യം,” ദിലീഷ് പറഞ്ഞു.

നിലവില്‍ ദിലീഷ് പോത്തനും ശ്യാം പുഷ്‌കരനും ഒന്നിക്കുന്ന ചിത്രം ഒരുങ്ങുകയാണ്. 2024ലാണ് ചിത്രം റിലീസിനെത്തുക. 2022 ല്‍ ഫഹദ് ഫാസിലിനെ നായകനാക്കി പുറത്തിറങ്ങിയ 'ജോജി' എന്ന ചിത്രമാണ് ദിലീഷ് പോത്തൻ്റെ സംവിധാനത്തില്‍ ഏറ്റവും ഒടുവിലായി പുറത്തെത്തിയ ചിത്രം. മഹേഷിൻ്റെ പ്രതികാരം, തൊണ്ടിമുതലും ദൃക്സാക്ഷിയും, ജോജി തുടങ്ങി ചിത്രങ്ങൾ എല്ലാം തന്നെ മലയാളത്തിലെ സൂപ്പർ ഹിറ്റുകളിൽ ഇടം നേടി. അതേസമയം ഭാവന സ്റ്റുഡിയോസിൻ്റെ അഞ്ചാമത്തെ ചിത്രം പ്രഖ്യാപിച്ചു കഴിഞ്ഞു. ഭാവന സ്റ്റുഡിയോസിൻ്റെ ബാനറില്‍ ദിലീഷ് പോത്തനും ശ്യം പുഷ്‌കരനും ഫഹദ് ഫാസിലും ചേര്‍ന്ന് നിര്‍മിക്കുന്ന ചിത്രം സംവിധാനം ചെയ്യുന്നത് എ ഡി ഗിരീഷ് ആണ്.