விக்ரம் மகன் துருவ் நடிக்கும் அடுத்த படம் குறித்த தகவல்
- IndiaGlitz, [Thursday,July 19 2018]
பிரபல இயக்குனர் பாலாவின் இயக்கத்தில் ஒரு படமாவது நடித்திட வேண்டும் என்று பல நடிகர்கள் காத்திருக்கும் நிலையில் சீயான் விக்ரமின் மகன் துருவ்க்கு அந்த அதிர்ஷ்டம் முதல் படத்திலேயே கிடைத்துவிட்டது. பாலா இயக்கத்தில் துருவ் நடித்து வரும் 'வர்மா' படத்தின் படப்பிடிப்பு விறுவிறுப்பாக நடைபெற்று வரும் நிலையில் இந்த படத்தின் படப்பிடிப்பு செப்டம்பரில் முடிவடையும் என எதிர்பார்க்கப்படுகிறது.
இந்த நிலையில் துருவ் நடிக்கவுள்ள அடுத்த படம் குறித்த தகவல் தற்போது வெளிவந்துள்ளது. தமிழ் சினிமாவில் மட்டுமின்றி தெலுங்கு சினிமாவிலும் துருவ்வை அறிமுகம் செய்ய வேண்டும் என்ற எண்ணத்தில் விக்ரம், அடுத்ததாக தனது மகனை பிரபல தெலுங்கு இயக்குனர் ஒருவரின் படத்தில் நடிக்க வைக்க முடிவு செய்துள்ளார். அவர்தான் பிரபல தெலுங்கு பட இயக்குனர் சேகர் கம்முலா. நயன்தாரா நடித்த 'அனாமிகா', 'ராணா டக்குபாய் நடித்த 'லீடர்', வருண், தமன்னா நடித்த 'ஹேப்பி டேய்ஸ்' உள்பட பல வெற்றிப்படங்களை இயக்கியவர் இவர் என்பது குறிப்பிடத்தக்கது.
இயக்குனர் சேகர் கம்முலா கூறிய ஆக்சன் கதை ஒன்று விக்ரமை வெகுவாக கவர்ந்ததால், துருவ்வின் அடுத்த படம் அவரது இயக்கத்தில் தான் என்று விக்ரம் முடிவு செய்துவிட்டதாக கூறப்படுகிறது. 'வர்மா' படத்தின் படப்பிடிப்பு முடிந்தவுடன் இந்த படம் குறித்த அறிவிப்பு வெளியாகும் என தெரிகிறது