சினிமாவில் தல அஜித் என்றால் கிரிக்கெட்டின் தல தோனி என்பது அனைவரும் அறிந்ததே. இந்த நிலையில் தோனி-சாக்சி தம்பதியின் இரண்டு வயது மகள் ஸிவா சமீபத்தில் ஒரு மலையாள பாடலை பாடிய வீடியோ ஒன்று நாடு முழுவதும் வைரலானது. மோகன்லால் நடித்த 'அத்வைதம்' என்ற படத்தில் இடம்பெற்ற 'அம்பலப்புழே' என்று தொடங்கும் இந்த பாடலை மலையாளத்தில் பிசிரில்லாமல் தோனியின் மகள் பாடியது அனைவரையும் ஆச்சரியத்தில் ஆழ்த்தியது

இந்த பாடலை கேட்ட திருவாங்கூர் தேவசம் போர்டுக்கு உட்பட்ட அம்பலப்புழா ஸ்ரீகிருஷ்ணன் கோவில் நிர்வாகிகள் வரும் ஜனவரி 14ஆம் தேதி நடைபெறும் பந்த்ரண்டு கலாபாம் என்ற விழாவில் கலந்து கொள்ள தோனி குடும்பத்திற்கு அழைப்பு விடுக்க திட்டமிட்டுள்ளனர். இந்த விழாவில் தோனியின் மகள் மலையாள பாடலை சிறப்பாக பாடியதற்கு கோவில் நிர்வாகம் சார்பில் வாழ்த்து தெரிவிக்கப்படவுள்ளது.

இதுகுறித்து அம்பலப்புழா ஸ்ரீகிருஷ்ணன் கோவில் ஆலோசனை குழு தலைவர் கொட்டாரம் உன்னிகிருஷ்ணன் கூறியபோது, 'விரைவில் தோனியை நேரில் சந்தித்து அவருடைய மகள் விழாவில் கலந்து கொள்ள அழைப்புவிடுக்க உள்ளதாக தெரிவித்தார்.