கவுதம் மேனன் இயக்கத்தில் தனுஷ், மேகா ஆகாஷ் நடித்து வரும் 'எனை நோக்கி பாயும் தோட்டா' படத்தின் இசையமைப்பாளர் யார் என்பதை அறிவிக்காமல் படக்குழுவினர் இதுவரை சஸ்பென்ஸ் ஆக வைத்திருந்தனர். இந்த படத்தில் இடம்பெற்ற 'மறுவார்த்தை பேசாதே' பாடலின் டீசர் வெளியானபோது கூட இசையமைப்பாளர் மிஸ்டர் எக்ஸ் என்றே அறிவிக்கப்பட்டிருந்தது

இந்த நிலையில் கவுதம்மேனனின் டுவிட்டரில் 'மறுவார்த்தை பேசாதே' படத்தின் முழுப்பாடலின் வீடியோ பதிவு செய்யப்பட்டுள்ளது. இந்த வீடியோவின் இறுதியில் இந்த பாடலை கம்போஸ் செய்தது தர்புகா சிவா என்று அறிவிக்கப்பட்டுள்ளது. எனவே இந்த படத்தின் இசையமைப்பாளர் தர்புகா சிவா என்பது தற்போது உறுதியாகியுள்ளது. தர்புகா சிவா ஏற்கனவே சசிகுமாரின் 'கிடாரி' மற்றும் 'பலே வெள்ளைத்தேவா' ஆகிய படங்களுக்கு இசையமைத்துள்ளார் என்பது குறிப்பிடத்தக்கது.

தனுஷ், மேகா ஆகாஷ், சுனைனா உள்பட பலர் நடித்துள்ள இந்த படத்தை 'ஒன்றாக எண்டர்டெயின்மெண்ட்' நிறுவனம் தயாரித்துள்ளது. ஜாமோன் ஜான் ஒளிப்பதிவில் ப்ரவீன் ஆண்டனி படத்தொகுப்பில் உருவாகியுள்ள இந்த படம் அடுத்த வருடம் வெளியாகும் என்று எதிர்பார்க்கப்படுகிறது.