சூப்பர் ஸ்டார் நடிக்கும் கபாலியில் 'மாரி' தனுஷ்?
- IndiaGlitz, [Saturday,October 10 2015]
அட்டக்கத்தி, மெட்ராஸ் படங்களை இயக்கிய பா.ரஞ்சித் இயக்கத்தில் சூப்பர் ஸ்டார் ரஜினிகாந்த் நடிக்கும் 'கபாலி' படத்தின் படப்பிடிப்பு சென்னை பின்னி மில்லில் விறுவிறுப்பாக நடைபெற்று வருகிறது. ரஜினிகாந்த் 'டான்' ஆக நடிக்கும் இந்த படத்தில் அவருக்கு ஜோடியாக ராதிகா ஆப்தே மற்றும் மகளாக தன்ஷிகா நடித்து வருகின்றனர். இந்த படத்தில் 'மெட்ராஸ்' கலையரசன், 'அட்டக்கத்தி' தினேஷ் உள்பட பலர் நடித்து வரும் நிலையில் பல படங்களில் வில்லன் மற்றும் குணசித்திர வேடங்களில் நடித்துள்ள நடிகர் ஜான் விஜய் புதியதாக இணைந்துள்ளார்.
'கபாலி' படத்தில் முக்கிய வேடத்தில் நடிக்கும் ஜான் விஜய்க்கு, மாரி படத்தில் தனுஷ் நடித்த கெட்டப் கொடுக்கபட்டுள்ளதாக கூறப்படுகிறது. மாரி' போன்ற அதே மீசை மற்றும் குறுந்தாடியுடன் ஜான்விஜய் இந்த படத்தில் தோன்றவிருப்பதாக கூறப்படுகிறது. இந்த கெட்டப்பின் புகைப்படம் தற்போது சமூக வலைத்தளங்களில் வைரலாக வருகிறது.
சந்தோஷ் நாராயணன் இசையமைத்து வரும் இந்த படத்தை கலைப்புலி எஸ்.தாணு பெரும் பொருட்செலவில் தயாரித்து வருகிறார். இந்த திரைப்படம், வரும் தமிழ்ப்புத்தாண்டுக்கு வெளியாகும் என கூறப்படுகிறது.