தனுஷ் நடித்த ‘அசுரன்’ மற்றும் 'பட்டாஸ்’ ஆகிய திரைப்படங்கள் அடுத்தடுத்து வெளியாகவிருக்கும் நிலையில் அவர் தற்போது கார்த்திக் சுப்புராஜ் இயக்கும் படத்தின் படப்பிடிப்பில் கலந்து கொண்டுள்ளார். லண்டனில் விறுவிறுப்பாக நடைபெற்று வரும் இந்த படத்தின் டைட்டில் குறித்த தகவல் தற்போது கசிந்துள்ளது.

தனுஷ்-கார்த்திக் சுப்புராஜ் முதல்முறையாக இணையும் இந்த படத்திற்கு ‘உலகம் சுற்றும் வாலிபன்’ என்ற டைட்டிலை படக்குழுவினர் தேர்வு செய்துள்ளதாக செய்திகள் வெளிவந்துள்ளது. மக்கள் திலகம் எம்ஜிஆர், லதா நடிப்பில் எம்ஜிஆர் இயக்கிய ‘உலகம் சுற்றும் வாலிபன்’ திரைப்படம் கடந்த 1973ஆம் ஆண்டு வெளியாகி அந்த காலத்திலேயே சுமார் ரூ.5 கோடி வசூல் செய்தது. இன்றைய மதிப்பில் அது ரூ.450 கோடிக்கு சமம் என்பது குறிப்பிடத்தக்கது. எம்ஜிஆரின் திரையுலக வாழ்வில் அதிக வசூலை செய்து சாதனை செய்த படம் என்ற பெருமை இந்த படத்திற்கு உண்டு. இந்த டைட்டில் தனுஷ் படத்திற்கு வைக்கப்பட்டால், டைட்டிலே படத்தின் வெற்றியை உறுதி செய்துவிடும் என்று நம்பப்படுகிறது.

ஒய்நாட் ஸ்டுடியோஸ் நிறுவனம் தயாரிக்கும் இந்த படத்தில் தனுஷூக்கு ஜோடியாக ஐஸ்வர்யா லட்சுமி நடித்து வருகிறார். ஜேம்ஸ் காஸ்மோ வில்லனாக நடிக்கும் இந்த படத்திற்கு சந்தோஷ் நாராயணன் இசையமைக்கவுள்ளார். ஷ்ரேயாஸ் ஒளிப்பதிவு செய்யும் இந்த படம் அடுத்த ஆண்டு வெளியாகும் என்பது குறிப்பிடத்தக்கது.